Məlum şəxslərin həbs edilməsi heç kəsə xüsusi imtiyaz verilmədiyini və heç zaman da verilməyəcəyini sübüt etdi - Ceyhun Məmmədov

Tarix: 22 Avqust 2020 16:04

Hamıya məlum olduğu kimi, ölkəmizdə hələ də pandemiya ilə bağlı karantin rejimi tətbiq olunur və müəyyən məhdudiyyətlər qoyulur. Hazırkı dövrdə toyların, yasların qeyd edilməsi qadağandır. Hər bir vətəndaş bu qadağalara əməl etməlidir. Lakin təəssüf hissi ilə qeyd etmək lazımdır ki, son hadisə göstərdi ki, bəzi vəzifəli şəxslər bu qaydalara, bu qanunlara əməl etmirlər. Bu günlərdə yüksək rütbəli şəxslərin, məmurların toy mərasimi təşkil etməsi və bu məclisdə karantin qaydalarına riayət edilməməsi cəmiyyətdə qınaq obyektinə çevrildi.

Sonxeber.net bildirir ki, bunu Trend-ə Milli Məclisin deputatı Ceyhun Məmmədov deyib.

Onun sözlərinə görə, Prezident İlham Əliyev hər zaman öz çıxışlarında da söyləyir, qanun hamı üçün qanundur, qanun qarşısında hamı bərabərdir:

"Bu gün ölkəmizdə çoxlu sayda ailə qurmaq istəyən vətəndaşlar var. Valideynlər övladlarının ailə qurmasını gözləyir. Bu günə kimi evində və ya hansısa qapalı məkanda əyləncə, toy, mərasim təşkil edən onlarla vətəndaş cərimələnib və şəxsi məsuliyyətə cəlb edilib. Belə bir şəraitdə statusundan istifadə edərək toy mərasiminin qeyd edilməsi yolverilməzdir və qanunaziddir. Hər bir vətəndaş mövcud reallığı, qanunların aliliyini başa düşməlidir. Koronavirusla mübarizə bütün ölkənin, statusundan asılı olmayaraq hər kəsin məsələsidir. Amma təəssüflə qeyd etmək lazımdır ki, bəzi insanlar bu qaydalara əməl etmirlər. Əlbəttə ki, ilk öncə dövlət məmuru, dövləti təmsil edən şəxslər bu qaydalara riayət etməlidir. Bu məsələdə dövlət məmurları özləri nümunə olmalıdırlar. Çalışmalıdırlar ki, bu qaydalar pozulmasın. Bu hərəkətləri ilə onlar cəmiyyətdə inamsızlıq, güvənsizlik və etibarsızlıq yaradırlar".

Deputat bildirib ki, qanunların aliliyini şübhə altına salırlar. Lakin məlum şəxslərin həbs edilməsi və cərimə olunması, hüquq-mühafizə orqanları tərəfindən müvafiq tədbirlərin görülməsi, Azərbaycanda heç kəsə xüsusi imtiyaz verilmədiyini və heç zaman da verilməyəcəyini sübüt etdi. Koronavirusla mübarizədə hər bir vətəndaş üçün Azərbaycan Prezidentinin sərt mövqeyi bir çağırış olmalıdır:

"Hər bir vətəndaş bu çətin günlərdə öz dövlətinin, xalqının yanında olmalı, öz dəstəyini əsirgəməməlidir. Bu cür hallarda laqeydlik, qanunlara əməl etməmək, məsuliyyətsizlik kimi hallara yol vermək olmaz. Hər kəs bilməlidir ki, qoyulan qadağalar, məhdudiyyətlər məhz insanların sağlamlığı və onların rifahı üçün edilir".