Ermənistan yarımçıq qalan arzularını təmin etməyə son qoymalıdır

Tarix: 13 Avqust 2021 15:48

"Ermənistan sərhəddə davamlı təxribatlar törədir, mövqelərimizi atəşə tutur, sərhədyanı ərazilərdə yaşayan mülki şəxslərin həyatı üçün təhlükə yaradır, 10 noyabr tarixli bəyanatla üzərinə götürdüyü öhdəlikləri kobud şəkildə pozur, bəndlərini isə absurd şəkildə şərh etmək cəhdləri göstərir".

Bunu Sonxeber.net-a açıqlamasında politoloq Şəbnəm Həsənova deyib.

O bildirib ki, təxribatların səngiməməsində maraqlı olan başqa qüvvələr də var:

"Ermənistanda yeni formalaşdırılan hökumətdən gələcəyə doğru addımların atılmasının gözlənildiyi halda, əksinə olaraq onlar vəziyyəti keçmişə doğru aparırlar. Geriyə doğru addımlamaqda maraqlı olan sadəcə Ermənistan deyil, başqa qüvvələr də mövcuddur.

Əvvəla ona toxunaq ki, bir tərəfdən ölkənin yeni Müdafiə naziri Karapetyan bildirir ki, əgər Ermənistan-Azərbaycan sərhədində vəziyyət sülh yolu ilə həll olunmasa, "İrəvan güc tətbiq etmək hüququnu özündə saxlayır". Ermənistan, elə Müdafiə naziri olmamışdan öncə də 2016-cı ildə Aprel döyüşləri zamanı Kəşfiyyat İdarəsinin rəisi olan Karapetyanın özü də Vətən müharibəsi zamanı aldıqları zərbəni unutmasınlar. Bölgədə vəziyyəti gərginləşdirən, təxribat törədən Ermənistandır. İkincisi, Azərbaycan Ermənistanın bu təxribatlara son qoymalı olduğunu bildirərək, qalib tərəf olaraq Ermənistana sülh də təklif edib. Üçüncüsü, söhbət gücdən gedirsə o zaman hərbi və siyasi güc üstünlüyünə malik tərəf Azərbaycandır. Sərhəddə mövqelərimiz bərpa edilib və daha da möhkəmləndirilir. Ermənistan ordusu isə Baş Qərargah səviyyəsində tam məhv edilib. Ermənistan bunların hamısını anlamalı və nəzərə almalıdır. 

İkincisi, bütün bunların fonunda ölkənin Baş naziri Paşinyan isə bir tərəfdən Prezident İlham Əliyevlə görüşməyə hazır olduğunu, bölgədə düşmənçilik və qarşıdurmanın daha da dərinləşməsinin yolverilməz olduğunu bildirirsə, digər tərəfdən də Ermənistan silahlı qüvvələri Laçın, Şuşa və Xocalı istiqamətində atəşkəsi pozurlar. O zaman belə məlum olur ki, Paşinyan rejimi danışıqlar aparmaq məsələsində əzmli deyil, və ya müstəqil qərar qəbul etmədə söz sahibi deyil. Belə olsa idi, Ermənistan təxribatlarının ardı-arasını kəsər, üçtərəfli bəyanatı ağılsız və şüursuz şəkildə şərh etməyə cəhd göstərməz, birbaşa danışıqlara gələrdilər.

Paşinyanın fikirlərinin digər istiqamətlərini də analiz edəndə aydın olur ki, deməli, təxribatların kəsilməməsində maraqlı olan başqa qüvvələr də mövcuddur. Çünki Paşinyan onu da qeyd edir ki, Ermənistan ATƏT-in Minsk qrupundan konkret təkliflər gözləyir. ATƏT-in Minsk qrupunun siyasi təsisat kimi yaradılmasının səbəbi və məqsədi münaqişənin həll olunması idisə, münaqişə başa çatıb. O zaman ATƏT-in Minsk qrupunu yenidən cəlb etməyin mənası yoxdur, çünki həll olunmalı münaqişə yoxdur. Digər bir vacib məsələ hələ də orada olan erməni silahlı qüvvələri ilə bağlıdır ki, onlarla bağlı məsələ də 10 noyabr 2020-ci il tarixli bəyanatın bəndlərindən birində açıqca öz əksini tapıb. Belə ki, bəyanatın 4-cü bəndində aydın şəkildə göstərilir ki, Rusiya Federasiyasının sülhməramlı kontingenti erməni silahlı qüvvələrinin çıxarılması ilə paralel şəkildə yerləşdirilir. Deməli, erməni silahlı qüvvələri bölgədən tamamilə çıxarılmalıdır. Burada heç bir halda hərbi qulluqçuların yerdəyişməsi və yerləşdirilməsi olmalı deyil. Nə Ermənistan bunu etməlidir, nə də Ermənistana bunu etmək üçün rəvac verilməli, şərait yaradılmalıdır. 

Azərbaycan tərəfi post-müharibə reallığına uyğun olaraq, konstruktiv mövqe sərgiləyərək Ermənistana təklif edir ki, delimitasiya və demarkasiya məsələləri həll olunsun, ərazi bütövlüyümüz tanınsın və böyük sülh sazişi imzalansın. Ermənistan diqtə ilə hansısa dairələrin maraqlarını, ya yarımçıq qalan arzularını təmin etməyə son qoymalıdır. Ermənistanın gələcək perspektivləri, bütövlükdə regiona inteqrasiyası və inkişafı qonşu dövlətlərlə normal münasibətlər yaratmaqdan, Azərbaycan Prezidenti İlham Əliyevin siyasi iradəsi nəticəsində formalaşdırılan yeni geosiyasi reallıqla barışmaqdan keçir. 44 günlük Vətən müharibəsində Azərbaycanın qətiyyətli mövqeyi hər bir provokativ dairəyə aydın və dərs olmalıdır".

Təhməz Əsədov