Mütəxəssis: Gürcüstanda koronavirusun “omikron” ştamının yayılması ehtimalı böyükdür

Tarix: 15 Dekabr 2021 23:16

"Bu gün Gürcüstanda koronavirusun "omikron" ştamına yoluxma halı qeydə alınmayıb. Amma bu virusun Gürcüstanda da yayılması ehtimalı böyükdür. Çox güman ki, yaxın bir ay ərzində Gürcüstanda da "omikron" ştamına yoluxma qeydə alınacaq".

Sonxeber.net AZƏRTAC-a istinadən bildirir ki, bu barədə mətbuata Gürcüstanın Xəstəliklərə Nəzarət və İctimai Səhiyyə Milli Mərkəzinin rəhbərinin müavini Paata İmnadze məlumat verib.

Onun sözlərinə görə, dünyada olan problemlər gec-tez Gürcüstanda da baş verir. Yaxın bir ay ərzində Gürcüstanda "omikron" sirkulasiyaya başladığı dövr olacaq.

Qeyd edək ki, artıq bir neçə gündür ki, Gürcüstanda "omikron" ştamı ilə əlaqədar araşdırmalara başlanılıb. Bəzi ağır koronavirus xəstələrində "omikron" ştamının olması barədə şübhələr yaransa da, hələlik bu təsdiqini tapmayıb.

Məlumat üçün bildirək ki, son sutka Gürcüstanda koronavirusa yoluxma halları yenidən artıb.

Son 24 saat ərzində ölkədə daha 3278 nəfər koronavirusa yoluxub, 53 nəfər pandemiyanın qurbanı olub.

Bununla da Gürcüstanda COVID-19-a yoluxanların ümumi sayı 898 079-a, sağalanların sayı 844 875-ə, bu virusdan ölənlərin sayı isə 12 879-a çatıb.