''Bu penaltidirsə, “Qəbələ”dəki nə idi?'' - Rəşad Sadıqov

Tarix: 19 Mart 2022 23:54

"7 oyun idi ki, uğurlu seriyamız var idi. Bu oyuna da böyük ümidlərlə hazırlaşmışdıq. "Neftçi" və "Qarabağ" kimi komandalarla matçlarda daha müdafiəyəmeyilli oynamağa çalışırsan. Amma həmin heyətlə öz oyunumuzu oynamağa çalışdıq. İlk hissəni uğursuz keçirdik. Rəqibə qol vurmaq imkanı verdik. Halbuki uzun müddətdir ki, "Qarabağ" həmin kombinasiyanı yerinə yetirir. Ruhdan düşmürdük".

Bu sözləri "Zirə"nin baş məşqçisi Rəşad Sadıqov Azərbaycan Premyer Liqasının 20-ci turunda "Qarabağ"a 0:3 hesabı ilə uduzduqları oyundan sonra keçirilən mətbuat konfransında deyib.

"Penaltidən sonra oyunun nəticəsi bəlli idi. Futbolçular mübarizə aparırdılar. Amma "Qarabağ"la matçda 0:2 hesabı ilə geridəsənsə, ondan sonra oyunu dəyişmək çətin olur. "Qarabağ" elə ondan sonra daha rahat oynamağa başladı. Oyunu çevirmək mümkün deyildi. Nəticədə 0:3 hesabı ilə uduzduq. Uğurlu qrafikə görə komandaya təşəkkür edirəm. Hər oyunda da qalib gəlmək mümkün olmur. Gərək, həmin gün şanslı da olasan . Qış fasiləsindən sonra ən yaxşı "Qarabağ"ı gördük.  "Qarabağ" böyük istəklə oynayırdı. İlk dəqiqədən 90-cı dəqiqəyə kimi eyni davam etdilər. Belə olan halda daha ciddi müqavimət göstərməlisən. Təəssüflər olsunki, bunu edə bilmədik"  - deyə o bildirib.

R.Sadıqov qapılarına təyin olunan penaltininin dönüş anı hesab edib-etməyəcəyi ilə bağlı söyləyib:  "Qarabağ" ora qədər də böyük üstünlüklə oynayırdı.  Oyunu dəyişmək çətin idi. Penaltiyə gəldikdə, bu penaltidirsə, "Qəbələ"dəki nə idi? Kadinin qolu ofsayd deyil? Niyə Təmkinin qolu ofsayd idi? Eyni briqada idi də. Hakimlikdən hər turdan sonra danışa bilərik. Amma danışıb, rəqibin uğuruna kölgə salmaq istəmirəm. Üçüncü qol Təmkinin epizodu ilə oxşar idi. Əgər bu penaltidisə, "Qəbələ"dəki 86-cı dəqiqədəki nə idi? Daim bu cür vəziyyətlə üzləşirik".

O, çempionatda neçənci yeri tutmaq şanslarının olduğu ilə bağlı verilən sualı belə cavablandırıb: "Proqnoz vermək  çətindir. Bu gün "Qarabağ"la çempionluq mübarizəsi aparmağımız real görünmür. Mövsümün əvvəlindəki hakim səhvləri olmasaydı, xal fərqimiz daha az ola bilərdi. Çempionatda onlarla çempionluq mübarizəsi aparacaq yeganə kollektiv "Neftçi"dir. 2-3-cü yer və ya avrokuboklar üçün mübarizə aparırıq. Çətin oyunlar üst-üstə oldu. Hamı bir-birilə oynayır. Çalışacağıq ki, qarşıdakı oyunlardan maksimum xallarla ayrılaq.

Özüm üçün hədəf avrokuboklara düşməkdir. Hamı bunu istəyir. Kim istəməz ki, çempion olsun? "Qəbələ"nin "Sabah"ın performansını nəzərə alsaq, avrokuboklara vəsiqə qazanmaq da uğur olacaq".

"Zirə"nin baş məşqçisi daha sonra vurğulayıb: "Elə oyun olur ki, 0:2 geridəsən və gedişat göstərir ki, oyunu dəyişə bilərsən. Amma elə oyun da olur ki, 0:4-ə doğru gedirsən və komandanı toparlamaq çətin olur. Qismət Əliyevin qırmızı vərəqə almasını istəmədim. Həm də baş verən insidentə görə əsəbləşdim. Hücumda da nəsə alınmırdı. Hər hansı dəyişiklik edib, gedişatı dəyişmək çətin idi. 0:2-dən sonra oyun bitmiş idi".

R.Sadıqov milli fasilədə hazırlıqla bağlı deyib: "Hələ heyət bilinmir. Cəlal U-21-ə, Volkov Gürcüstan yığmasına gedir. Bir tərəfdən milli üzvlərinin çox olmasını istəyirsən, digər tərəfdən oyunçuların qalıb hazırlaşmasını. Amma yığma da vacibdir. Nə qədər çox futoblçu dəvət alsa, sevinərik".