Rusiya separatçı ssenarini işə saldı - “Yeni qondarma respublika...”

Tarix: 26 Aprel 2022 21:12

"Rusiya saxta referendum yolu ilə Donetsk və Luqanska bənzər "Xerson Xalq Respublikası" təsis edərsə, Kiyevin Moskva ilə danışıqların əhəmiyyəti qalmayacaq".

Sonxeber.net teleqraf.com-a istinadən bildirir ki, bunu politoloq Elxan Şahinoğlu deyib.

Ekspert Rusiya-Ukrayna müharibəsi ətrafında gedən son gəlişmələrə diqqət çəkib:

"Rusiya işğal etdiyi Ukraynanın Xerson bölgəsində "referendum" keçirmək istəyir. Doğrudur, rusiyalı rəsmilər hələ ki, bu xəbəri təsdiq etmirlər, ancaq bu, heç nəyi dəyişmir. Ona qalsa, Rusiya rəsmiləri işğalçı müharibədən bir neçə gün əvvəl yalandan açıqlama verirdilər ki, Ukraynaya hücum etmək kimi planları yoxdur.

Xerson Rusiya üçün vacib bölgədir. Krımın 85 faiz su ehtiyatı Xersondan keçən kanal vasitəsilə təmin olunur. Krım 2014-cü ildə ilhaq olunanda Kiyev kanaldan yarımadaya suyun verilməsini kəsdi. Rusiya Xersonu işğal etdikdən sonra kanaldan Krıma su çatdırılmasını təmin edib.

Digər tərəfdən, rusiyalı hərbçilər Xersonun bütün administrativ binalarında Ukrayna bayraqlarını yığışdıraraq Rusiya bayraqlarını sancıblar. Bütün bunlar varkən, Rusiya Xersondan çıxarmı?".

Elxan Şahinoğlu Rusiyanın işğal edilmiş Xersonda qondarma respublika yaratmaq cəhdlərinə toxunub:

"Rusiya saxta referendum yolu ilə Donetsk və Luqanska bənzər "Xerson Xalq Respublikası" təsis edərsə, Kiyevin Moskva ilə danışıqların əhəmiyyəti qalmayacaq. Xersonda işğala etiraz edənlərlə yanaşı, satqınlar da var. Həmin satqınlar işğalçılarla əməkdaşlıq edir, onların əmrlərini yerinə yetirirlər. Ancaq həmin satqınlar qorxu içində belə bir sualı da gündəmə gətirirlər: "Rusiya Xersonu tərk edərsə bizi kim qoruyacaq?".

Satqınlar vətənə xəyanət maddəsi ilə cəzalandırılacaqlarını istisna etmirlər. Ukraynanın Xersonu geri qaytarmaqdan başqa alternativi yoxdur".