Bakı-Minsk reysində vəfat edən sərnişin azərbaycanlı imiş - YENİLƏNİB

Tarix: 5 May 2022 15:34

15:33

Bu gün Bakı-Minsk reysi ilə uçan sərnişinlərdən birinin - 1958-ci il təvəllüdlü azərbaycanlının (adı açıqlanmır) halı pisləşib və, o, 2 saatlıq uçuşdan sonra huşunu itirib.

Bu barədə "Report"a Belarusun "Belavia" aviaşirkətindən məlumat verilib.

Bildirilir ki, sərnişin təyyarənin göyərtəsinə yüngül xəstə kimi çatdırılıb.

"Stüardessalar təyyarədə həkim axtarışı ilə bağlı xəbər veriblər. Sərnişinin özünə gəlməsi üçün oksigen və ammonyak veriblər. Təlimatlara uyğun hərəkət edən ekipaj təyyarədə fövqəladə vəziyyət yaranması ilə bağlı məlumat verib və Samarada təcili eniş edib. Həkimlər gələnə qədər sərnişini stüardessalardan biri müşayiət edib və ona tibbi yardım göstərilib", - aviaşirkətdən bildirilib.

Məlumata görə, Kurumoç Hava Limanına endikdən sonra həkimlər qrupu sərnişinin öldüyünü elan edib:

"Ölümün səbəbini müəyyən etmək üçün məhkəmə-tibbi ekspertizası aparılacaq".

Aviaşirkət mərhumun ailələrinə və yaxınlarına başsağlığı verir.

----------

14:20

Səhər saatlarında Bakıdan Belarusun paytaxtı Minskə uçan təyyarənin sərnişininin vəziyyəti pisləşib. "В2740" səfər saylı təyyarə Rusiyanın Samara şəhərinə təcili eniş edib.

Milli.Az oxu.az-a istinadən xəbər verir ki, xəstə olan 64 yaşlı sərnişin "Kurumoç" hava limanında vəfat edib.

Hadisə ilə bağlı Rusiya Federasiyası İstintaq Komitəsinin Nəqliyyat üzrə Mərkəzi Regionlararası İstintaq İdarəsi məlumat yayıb.

Fakt araşdırılır.

Milli.Az