Polşa Almaniyanı Ukraynaya görə ittiham edib

Tarix: 22 Iyul 2022 23:40

Polşanın xarici işlər nazirinin müavini Şimon Şinkovski Vel Senk Almaniya hökumətini "dairəvi mübadilə" çərçivəsində Ukraynaya göndərdiyi "T-72" tanklarının müqabilində Polşa ordusuna verməli olduğu tanklarla bağlı vədini pozmaqda ittiham edib.

Sonxeber.net "report"a istinadən xəbər verir ki, o, bu barədə Almaniyanın "Der Spiegel" qəzetinə müsahibəsində bildirib.

"Almaniyanın "dairəvi mübadilə" ilə bağlı vədləri aldadıcı manevr çıxdı", - Şinkovski Vel Senk deyib.

Xatırladaq ki, Polşa tərəfi Rusiyanın Ukraynaya hərbi müdaxiləsindən az sonra Kiyevə 200-dən çox "T-72" tankı verib. Rəsmi Varşava Almaniyanın vədinə əməl edəcəyinə və Polşa ordusunun ehtiyatlarını dolduracağına ümid bağlayırdı.

Eyni zamanda, "Der Spiegel" Polşa ilə sövdələşmənin, yəqin ki, artıq iflasa uğradığını yazıb.

Polşa XİN rəhbərinin müavini qeyd edib ki, Almaniya əvvəlcə polyaklara Polşanın Ukraynaya verdiyi tanklardan daha köhnə olan tankları təklif edirdi.

"Bu təklif isə qəbul oluna bilməz, çünki biz silahlı qüvvələrimizin durumunun pisləşməsində və əsgərlərimizin 1960-cı illərin texnikası ilə təlim keçməsində maraqlı deyilik", - o vurğulayıb.