''Uğurumuzun arxasında dayanan əsas məqam məhz budur''

Tarix: 1 Avqust 2022 16:39

"Dünyanın yenidən bölüşdürülməsi istiqamətində səylər davam edir. Müxtəlif regionlarda toqquşma ocaqlarının yaranması da bununla bağlıdır".

Bunu report-a açıqlamasında Bakı Dövlət Universitetinin professoru, politoloq Əlimusa İbrahimov deyib.

Hazırda planetdəki xaosun Azərbaycandan yan keçdiyini vurğulayan politoloq bunun əsaslı səbəblərinin olduğunu bildirib.

Onun sözlərinə görə, artıq kimsə Azərbaycana təsir etmək imkanlarına malik deyil: "Biz Vətən müharibəsi nəticəsində torpaqlarımızı işğaldan azad etməklə öz gələcəyimizi müəyyənləşdirdik. Artıq heç bir dövlətin ərazilərimizdə gözü yoxdur. Çünki kimsə bizə təsir etmək imkanına malik deyil. Azərbaycan öz tərəfini daha özü seçir. Rəsmi Bakı artıq proseslərdə öz sözünü deyən aktordur. Biz bunu ayrı-ayrı vaxtlarda, o cümlədən Ukraynadakı savaşda gördük. Təsadüfi deyil ki, Türkiyə Prezidenti Rəcəb Tayyib Ərdoğan dövlət başçımız İlham Əliyevin siyasi məharətini dəfələrlə xüsusi qeyd edib".

Ə.İbrahimov söyləyib ki, Azərbaycan yaxın qonşuları üçün də uğurlu nümunədir: "Ermənistandan gələn siqnallar artıq İrəvanda hakimiyyətdə olanların da Azərbaycanın şərtləri ilə razılaşdığını göstərir. Beləliklə, sadaladığımız bütün məqamlar onu deməyə əsas verir ki, kimsə Azərbaycanı münaqişəyə çəkə bilməz".

Politoloq bildirib ki, torpaqları uğrunda azadlıq mübarizəsi aparan dövlətlər Azərbaycan təcrübəsindən yararlanmalıdırlar: "Biz əks-hücum əməliyyatlarına birdən-birə başlamadıq. Uzun illər bu savaşa hazırlıq gördük. İkincisi, Azərbaycan üçün müharibə axırıncı variant idi. Biz 30 il danışıqlar aparmağa çalışdıq, məsələni sülh yolu ilə həll etmək istədik. Lakin İrəvan bununla razılaşmadı, beynəlxalq siyasi aktorlar proseslərə konstruktiv mövqedən yanaşmadı. Nəhayət, biz məcbur olaraq Ermənistanın təxribatlarına adekvat cavab verdik. Yəni, rəsmi Bakı danışıqlar potensialından sonadək istifadə etdi. Bundan başqa, biz əks-hücum əməliyyatları üçün ən uğurlu vaxtı seçdik. Ukraynadakı müharibədə isə sadaladığımız məqamları müşahidə edə bilmədik. Düşünürəm ki, bu gün beynəlxalq müharibə araşdırmaları institutlarının İkinci Qarabağ müharibəsini hərbi-siyasi cəhətdən öyrənmələri bizim necə böyük nailiyyət qazandığımızı bir daha təsdiqləyir".

Professor həmçinin bildirib ki, Azərbaycanın dünyadakı nüfuzu hər ötən gün artır: "Biz çətin mərhələlərdən keçdik: əvvəlcə Vətən müharibəsini uğurla başa vurduq, koronavirus pandemiyasına ilə bağlı iki illik karantin rejimini geridə qoyduq. İndi isə işğaldan azad edilmiş ərazilərimizin minalardan təmizlənməsi ilə məşğuluq. Amma reputasiyamız get-gedə güclənir. Bunun əsas səbəbi xalqla siyasi rəhbərliyin bir-birilərinin yanında olmasıdır. Azərbaycan xalqı savaşdan əvvəl olduğu kimi, savaşdan sonra da Prezidentin ətrafında yumruq kimi birləşdi. Uğurumuzun arxasında dayanan əsas məqam da məhz budur".