Doqquz yaşlı uşağı supermarketdə soyuducuya atdılar

Tarix: 29 Avqust 2022 21:06

Rusiyada Novosibirskdə saxlama müddəti ötmüş mallardan şikayət edən doqquz yaşlı uşaq supermarketin soyuducusunda kilidlənib.

Sonxeber.net bildirir ki, bu barədə Rusiya İstintaq Komitəsinin regional istintaq idarəsinin saytında məlumat verilib.

Uşağın atası bildirib ki, oğlan dostları ilə birlikdə Seleznyov küçəsində yerləşən "Mariya-Ra" ərzaq supermarketinə gedib. Uşaq vaxtı keçmiş məhsulu görüb və satıcıya məlumat verib.

Buna cavab olaraq qadın söyüş söyməyə başlayıb, arabanı uşaqlardan alıb və onları mağazadan çıxarıb. Bundan əlavə, o, guya bu cür davranışa görə oğlanları üç il müddətinə həbs edə biləcəkləri ilə hədələyib. Bir neçə dəqiqədən sonra doqquz yaşlı uşaq geri qayıdıb və telefonunda vətəndaşların rəflərdən müddəti ötmüş malların çıxarılmasını tələb edə biləcəyini vurğulayan bir məqaləni satış mərkəzinin əməkdaşına göstərib.

Bundan sonra satıcı bir kişi ilə telefonla əlaqə saxlayıb. O, kişidən gəlib oğlanla bu məsələni həll etməyə xahiş edib. "Naməlum şəxs oğlumun əlindən tutub arxa otağa dartıb. Soyuducuya tərəf sürükləyib. Oradan bir neçə qutu atıb, uşağı içəri salıb bağlayıb. Orada soyuq idi, işıq da yox idi", - deyə zərərçəkənin atası bildirib.

Hadisədən sonra cinayət-prosessual yoxlama təşkil edilib. Bundan əlavə, rayon prokurorluğu şəhər supermarketində qayda-qanunla maraqlanıb. "Bununla bağlı hüquq-mühafizə orqanlarına daxil olmuş materiallar araşdırılır. Əgər əsaslar olarsa, prokurorluq tərəfindən cavab tədbirləri görüləcək", - idarədən əmin ediblər.

İrfan Vəliyev