Depressiya riskini azaltmağın ən asan yolu açıqlandı

Tarix: 24 Iyul 2024 07:21

Meyvə istehlakı yaşlılarda depressiya riskini azaldır.

Sonxeber.net medicina.az-a istinadən xəbər verir ki, bunu Sinqapur Milli Universitetinin alimləri müəyyən ediblər.

Onların fikrincə, gənc və orta yaşlarda bol miqdarda meyvə istehlakı 70 yaşdan sonra depressiyaya düşmə riskini azaldır.

Tədqiqatın nəticələri "Journal of Nutrition, Health and Aging" jurnalında dərc edilib.

Elm adamları orta yaşı 51 olan 13 738 iştirakçının qida rasionunu təhlil etdikdən sonra bu qənaətə gəliblər.

Subyektlərdən müəyyən qida qruplarını (meyvə, tərəvəz, dənli bitkilər, qənnadı məmulatları) nə qədər tez-tez istehlak etdiklərini və optimal hesab etdikləri porsiya miqdarını qeyd etmələri istənilib.

Lazımi məlumatları topladıqdan sonra alimlər iştirakçıları müşahidə etməyə başlayıblar.

Tədqiqatın ikinci mərhələsində, könüllülərin orta yaşı 73-ə yaxınlaşdıqda, onların psixi sağlamlığı Geriatrik Depressiya Şkalasından istifadə edilərək yoxlanılıb.

Nəticələr göstərib ki, 40-65 yaş arasında aktiv meyvə istehlakı yaşlı insanlarda depressiya əlamətləri riskini azaldır.

Tədqiqatçılar bu faydalı təsirin meyvələrdə olan antioksidantlar və C vitamini, karotenoidlər, flavonoidlər kimi antiinflamatuar mikroelementlərlə əlaqədar olduğunu irəli sürüblər.

Bu maddələr oksidləşdirici stressi azalda bilər (bədənin hüceyrələrini zədələnmədən qoruyur) və bir çox xəstəliklər üçün risk faktoru olan iltihabı azaldır.