Türkiyə altı yeni tipli sualtı qayığa sahib olacaq

Tarix: 24 Avqust 2024 23:52

2029-cu ilə qədər Türkiyə Hərbi Dəniz Qüvvələri yeni tipli altı yerli sualtı qayıq alacaq.

Sonxeber.net oxu.az-a istinadən xəbər verir ki, bunu Türkiyə Prezidenti Rəcəb Tayyib Ərdoğan ilk belə gəmi olan "TCG Piri Reis"in istismara verilməsi mərasimində bildirib.

"Bu əlamətdar gündə ordumuz üçün kritik əhəmiyyətə malik olan yeni sualtı qayıq "TCG Piri Reis" ilə birlikdə cari ildə ikinci bu tip sualtı qayığımızı - "TCG Hızır Reis"i sınaqdan keçiriləcək, 2025-ci ildə xidmətə qəbul edəcəyik. Üçüncü qayıq olan "TCG Murat Reis" isə 2026-cı ildə istifadəyə veriləcək. 2029-cu ilə qədər bu tip altı sualtı qayığın hamısı xidmətə başlayacaq", - deyə Ərdoğan bildirib.

Prezident qeyd edib ki, Türkiyə "üç tərəfdən dənizlərlə əhatə olunmuş, güclü və təsirli donanmaya ehtiyacı olan bir ölkədir".

Onun sözlərinə görə, yeni sualtı qayıqlar Türkiyə donanmasının strateji silahlarıdır, yerli silah növləri və digər sistemlərlə təchiz olunub.