Yaremçuk Bakı finalından danışdı

Tarix: 13 May 2019 17:08

"Mayın 29-da Bakı Olimpiya Stadionunda keçiriləcək UEFA Avropa Liqasının final qarşılaşmasının yüksək səviyyədə təşkil ediləcəyi heç kimdə şübhə doğurmamalıdır. Çünki Azərbaycan bu oyuna qədər bir sıra nüfuzlu yarışlara ev sahibliyi edib".

Bu sözləri futbol üzrə SSRİ yığmasının sabiq üzvü İvan Yaremçuk  deyib.

Azərbaycanın dünyada idman dövləti kimi tanındığını vurğulayan sabiq futbolçu bildirib ki, ötən illərdə müasir stadionlar, idman qurğuları tikilib, mötəbər beynəlxalq yarışlar yüksək səviyyədə keçirilib.

“İdman azarkeşləri Bakıda özlərini həmişə təhlükəsiz hiss ediblər. Çünki Azərbaycanda ictimai sabitlik hökm sürür. Yadımdadır, ilk Avropa Oyunları zamanı turistlər Azərbaycandakı xidmətlərdən razılıq edirdilər. İnanıram ki, UEFA Avropa Liqasının final oyunu zamanı Bakıya gələcək azarkeşlər də özlərini rahat, güvəndə hiss edəcəklər”, - deyə ukraynalı əfsanəvi futbolçu bildirib.

İ.Yaremçuk imkanı daxilində UEFA Avropa Liqasının final oyununun Bakıda canlı izləyəcəyini də vurğulayıb.

Mənbə: Azərtac