Azərbaycan İranla sərhədin daha iki həftə bağlı saxlanılmasına qərar verib

Tarix: 12 Mart 2020 22:08

İslam Respublikası ilə sərhədin məhdudlaşdırıcı rejim əsasında müvəqqəti bağlı saxlanmasına dair qərar növbəti iki həftə müddətinə uzadılıb.

Bu barədə Nazirlər Kabineti yanında Operativ Qərargah məlumat yayıb.

Məlumata görə ,Ümumdünya Səhiyyə Təşkilatı tərəfindən koronavirus infeksiyasının (COVİD-19) qlobal pandemiya elan olunduğunu nəzərə alaraq, Azərbaycan Respublikası ərazisində virusun yayılmasının qarşısını almaq məqsədilə 29 fevral 2020-ci il tarixində qəbul edilmiş İran İslam Respublikası ilə sərhədin məhdudlaşdırıcı rejim əsasında müvəqqəti bağlı saxlanmasına dair qərar növbəti iki həftə müddətinə uzadılıb.

Azərbaycanda 15 nəfər koronavirusa yoluxma halı aşkarlanıb. Onlardan 3 nəfəri müalicə olunaraq sağalıb və evə buraxılıb. Hazırda xüsusi rejimli xəstəxanalarda 12 nəfərin müalicəsi davam etdirilir.

Bir neçə yüz insan isə karantində saxlanılır. Virusa yoluxanların və karantində saxlanılanların böyük əksəriyyəti İrandan gələnlərdir.

Ötən ilin sonunda Çində yeni koronavirus aşkar edilib. Bir müddət sonra bu virus Azərbaycanın qonşusu - İranda da özünü kəskin şəkildə göstərməyə başlayıb. Bundan sonra bir sıra ölkələr İranla sərhədi bağlayıb. Azərbaycan isə bəzi qonşu ölkələrdən bir qədər gec - yalnız fevralın 29-da iki həftəlik İranla dövlət sərhədlərinin məhdudlaşdırıcı rejim əsasında bağlanması barədə qərar verdiyini açıqlayıb.