''SmartPay” ödəmə sisteminin onlayn platformasına tələbat artıb

Tarix: 5 May 2020 17:36

Bakı. Trend:

Xüsusi karantin rejimi dövründə Nəqliyyat, Rabitə və Yüksək Texnologiyalar Nazirliyinin Məlumat Hesablama Mərkəzinin məhsulu olan “SmartPay” ödəmə sisteminin onlayn platformasına tələbat artıb.

Nazirlikdən Trend-ə verilən məlumata görə, bu sistem üzərindən Koronavirusla Mübarizəyə Dəstək Fonduna da ianə köçürmək imkanı yaradılıb.

Bir çox xidmətləri vahid platformaya toplayan “SmartPay” ödəniş sistemindən “smartpay.az” saytı üzərindən yararlanmaq mümkündür. Həmçinin, Azərbaycanın bütün bölgələrini əhatə edən poçt məntəqələrindəki “SmartPay” terminallarında və poçt şöbələrində əməliyyatçılara yaxınlaşmaqla ödəniş etmək olur.

Bu ödəmə sistemi istifadəçilərin fərdi məlumatlarının təhlükəsizliyinə və mühafizəsinə tam zəmanət verir. Nəzarət mexanizmi sistemdə baş verə biləcək saxta əməliyyatları, icazəsiz hərəkətləri izləmək və anında bloklamaq imkanı təqdim edir.

Ödəniş sistemi tərəfindən mütəmadi monitorinq aparılır. Bu isə müəyyən edilmiş meyarlara uyğun olaraq şübhəli əməliyyatları izləmək və təhlil etmək imkanı yaradır.

Həmçinin, istifadəçi diqqətsizliyi tərəfindən yarana biləcək problemin də qarşısını alacaq imkanlar mövcuddur. Belə ki, istifadəçi öz kompüterini və ya mobil cihazını bloka salmadan, yəni elektron cüzdanını açıq qoymaqla təhlükəsizlik qaydasını poza bilər. “SmartPay” ödəmə sistemi bu riskdən qorunmaq üçün elektron cüzdanda birdəfəlik və dinamik şifr sistemi də nəzərdə tutub. İstifadəçi öz elektron cüzdan hesabından bu sistemi dayandıra və ya aktivləşdirə bilər. Ayarlar bütün növ əməliyyatlar üçün nəzərdə tutulub.

İstifadəçilərə ödənişlərin qəbzlərini yaddaşda saxlamaq üçün qeydiyyatdan keçərək şəxsi kabinetdən ödəniş etmək tövsiyə olunur.