“Honor 8S” smartfonu nümayiş olunub

Tarix: 9 Iyun 2020 08:04

Çinin texnoloji nəhəngi "Huawei" Böyük Britaniyada "Honor 8S" smartfonunu təqdim edib. Ucuz qurğular sinfinə aid "Honor 8S" ötənilki "Honor Play" modelinin təkmilləşdirilmiş versiyası hesab olunur.

Sonxeber.net ictnews.az-a istinadən bildirir ki, 2019-cu ildə buraxılan "Honor Play" 2 giqabaytlıq operativ və 32 giqabaytlıq quraşdırılmış yaddaşla bir sıra ölkələrdə satışa çıxarılıb. Yeni qurğu isə 3 giqabaytlıq operativ və 64 giqabaytlıq quraşdırılmış yaddaşla təchiz edilməklə eyni smartfondur. Qurğunun əsasını dörd "Cortex-A53" nüvəsi və "PoverVR GE8320" qrafik prosessorunun daxil olduğu 12 nanometrlik "MediaTek Helio A22" prosessoru təşkil edir. 5,71 düymlük displey "HD plus" təsvir ölçülü və 19:9 tərəf nisbətli matrisa ilə təchiz olunub.

Qurğu 31 meqapikselli əsas modul kamerası və damcıvarı şəkildə yerləşən 5 meqapikselli ön sensorla təchiz olunub. Bundan başqa, "4G" şəbəkəsi, 2,4 giqaherslik birzolaqlı "Wi-Fi" qoşulma və "GPS" dəstəklənir. Smartfona enerji "Micro-USB" çıxışı vasitəsilə doldurulur. Həmçinin simli qulaqcığın qoşulması üçün 3,5 millimetrlik çıxış nəzərdə tutulub.

Smatfon "EMUI 9.0" proqram təminatlı "Android 9 Pie" əməliyyat sisteminin idarəetməsi ilə işləyir. Quraşdırılmış akkumulyatorun tutumu 3020 milliamper/saata bərabərdir. Sürətli enerjidoldurma funksiyası mövcud deyil.

"Honor 8S" smartfonunun qiyməti 99,99 funt-sterlinqə bərabərdir.