Avrokuboklarda sarı vərəqələr silinir - Yeni qaydalar

Tarix: 5 Avqust 2020 15:28

Avrokuboklarda bu mövsüm 1/8 finalın oyunlarından sonra futbolçuların sarı vərəqələri silinəcək.

Sonxeber.net qol.az-a istinadən xəbər verir ki, bu barədə qurumun İcraiyyə Komitəsi qərar verib.

Koronavirus pandemiyasının yaratdığı çətinliklərdən sonra klublarda balansı qorumaq üçün bu addım atılıb.

Yeni mövsümdən isə avrokubokların təsnifat və pley-off mərhələsinin oyunlarında alınan sarı vərəqələr qrup mərhələsinin matçlarına təsir etməyəcək.

Digər bir qərara əsasən, 2020/2021 mövsümündə UEFA bayrağı altında keçirilən qarşılaşmanın oynanılacağı ölkədə karantin və ya səyahət məhdudiyyətləri olacağı halda, oyun başqa ölkədə keçirilə bilər. Bunu ev sahibi komanda təşkil etməlidir. Əks halda həmin komanda texniki məğlubiyyət alacaq. Hər püşkdən əvvəl UEFA ölkələr arasında bütün səyahət məhdudiyyətlərinin, eyni zamanda ölkələrdə tətbiq edilən karantin qaydalarının siyahısını dərc edəcək. Klublar yerli federasiya ilə birgə püşkdən iki gün əvvəl məhdudiyyətləri UEFA-ya bildirməlidilər.

Oyunu öz meydanında keçirə bilməyən klub bununla bağlı püşkə iki gün qalmışa qədər UEFA-nı məlumatlandırmazsa, həmin kluba texniki məğlubiyyət veriləcək.

Klublar daha əvvəl UEFA-da qeydiyyatdan keçirmədiyi, ancaq yerli assosiyasiyalarda klubun futbolçusu kimi qeydiyyata alınan və testi neqativ çıxan futbolçuları heyətə daxil edə bilər.

Həmçinin, hakimlər briqadasının hər hansı üzvünün testi müsbət çıxarsa, UEFA istisna hal kimi klublarla eyni ölkədən olan hakimi oyuna təyin edə bilər.

Bundan başqa, klublarda bir neçə nəfərin virusa yoluxması oyunlara təsir etməyəcək. Yeni mövsümdə bir klubda biri qapıçı olmaqla, ümumilikdə 13 futbolçu sağlamdırsa, qarşılaşmalar oynanılacaq.