“Kəndlərdə idmanı inkişaf etdirək” layihəsi üzrə növbəti tədbir Şabranda keçirilib (FOTO)

Tarix: 29 Avqust 2020 09:32

Bakı. Trend:

AFFA-nın və Şabran Rayon İcra Hakimiyyətinin birgə təşkilatçılığı ilə Şabran rayonunda “Kəndlərdə idmanı inkişaf etdirək” layihəsi üzrə növbəti tədbir rayonun Dəvəçi kənd stadionunda keçirilib.

Trend-in məlumatına görə, bu layihə Azərbaycan Respublikasının Prezidenti İlham Əliyevin 29 dekabr 2019-cu il tarixdə Azərbaycan Milli Olimpiya Mərkəzində idmançılarla görüşü zamanı kəndlərdə idmanın inkişafına dair verdiyi tövsiyyələrin yerinə yetirilməsi istiqamətində atılmış addımdır. Bu layihə çərçivəsində keçirilən tədbirdə rayonun Dəvəçi,Sincanboyad, Mollakamallı, Gəndov kəndlərindən və rayon mərkəzindən 50 məktəbli uşaq iştirak edib. Tədbirdə iştirak edən uşağlara futbola marağı artırmaq məqsədi ilə pulsuz idman geyimləri və futbol topları verilib.

Tədbirdə Şabran Rayon İcra Hakimiyyətinin başçısı Asif Hüsüynov, AFFA-nın vitse-prezidenti, Azərbaycan Uşaq və Gənclər Futbol Federasiyasının prezidenti, Milli Məclisin deputatı Rauf Əliyev, Milli Məclisin Təbii ehtiyatlar, energetika və ekologiya komitəsinin sədri, 54 saylı Şabran-Siyəzən seçki dairəsindən Milli Məclisə seşilmiş deputat Sadiq Qurbanov, Şabran RİHB-nin birinci müavini, YAP Şabran rayon təşkilatının sədri Mehdi Balabəyov, Şabran Rayon Gənclər və İdman İdarəsinin rəisi Süleyman Əliməmmədov iştirak etmişdir. Bu layihə üzrə tədbirlərin digər bölgələrdə də həyata keçirilməsi nəzərdə tutulub.