''Regionda erməni terrorist şəbəkəsi yaranır'' - Ermənistanın Qarabağ PLANI

Tarix: 31 Avqust 2020 16:33

"Bu məqamda yaxın keçmişdəki analogiyaları yada salmaq lazımdır. Yaxın keçmişdə, I Qarabağ Müharibəsində ermənilər fəal şəkildə Suriyadan, Livandan, digər ölkələrdən olan erməniləri müharibəyə cəlb edirdilər və bu müharibə zamanı əsas vəhşilikləri bu silahlılar, terrorçular törədirdilər". 

Bunu Sonxeber.net-a açıqlamasında "Cənubi Qafqaz" politoloqlar klubunun rəhbəri İlqar Vəlizadə Ernənistanda "Müdafiə haqqında" qanuna dəyişikliklərin ictimai müzakirəyə çıxarılması məsələsini şərh edərkən deyib.

O bildirib ki, Ermənistanda "Müdafiə haqqında" qanuna dəyişikliklərin müzakirəsi Ermənistan tərəfindən aparılan Qarabağ müharibəsinin terror mahiyyətini açıqlayır:

"Monte Melkonyan tutumuş digərlərinin "şücaətləri" hələ də bizim yadımızdadır. Bu, əslində Ermənistan siyasətinin, ümumiyyətlə Ermənistan tərəfindən aparılan Qarabağ müharibəsinin terror mahiyyətini açıqlayır. Heç kəsə sirr deyil ki, indi Livanda, ələlxüsus da Suriyada terrorçuları hazırlayan bir neçə düşərgələr var. Xüsusilə də Suriyada bu düşərgələr kürdlərin nəzarəti altında olan yerlərdə yerləşirlər. Bunlar PYD silahlıları ilə sıx təlimlər keçən erməni terrorçulardır.

Onların əsas məqsədi Ermənistan ideyasına, "Böyük Ermənistan" ideoloji əsaslarına xidmət etməkdir. Düşünürəm ki, bu qanun qəbul olunduqdan sonra sözügedən düşərgələrdə təlim keçən ermənilər artıq qanuni əsaslarla Ermənistanın ordusuna cəlb oluna və burada xidmət keçə bilərlər. Çox güman ki, onların xidmətindən Azərbaycana qarşı istifadə olunacaq. Onların böyük bir qismi Qarabağa yönəldiləcək".

Politoloq qeyd edib ki, regionda terror şəbəkəsinin yaranmasında Ermənistan dövləti fəal iştirak edir:

"Dağlıq Qarabağda qondarma rejim tərəfindən məskunlaşma siyasəti həyata keçirilir. Xaricdən olan muzdluları orduya cəlb etmək və Qarabağda ermənilərin məskunlaşma siyasəti aparması planları üst-üstə düşür. Çünki son nəticə etibarilə həmin muzdlular Qarabağa gəlirlər. Bir çox hallarda istisna olunur ki, onlar ailələri ilə gələcəklər və orada məskən salacaqlar. Təxminən belə bir proseslər yaşanır.

Əslində bunlar doğrudan çox təhlükəli proseslərdir. Bu, onu göstərir ki, Ermənistan terrorçuluq siyasətindən əl çəkmir. Nəinki əl çəkmir, regionda sanki erməni terror şəbəkəsi yaranır. Bu şəbəkənin yaranmasında artıq Ermənistan dövləti fəal olaraq iştirak edir. Çünki bax o "qanunlar" imkan yaradır ki, bu terror şəbəkəsi inkişaf etsin və Ermənistan hakimiyyəti bu terror şəbəkəsinin başında dursun, şəbəkənin formalaşdırılmasına imkan yaratsın. Əslində, bu, regionumuz üçün böyük təhlükədir. Düşünürəm ki, Minsk Qrupu buna diqqət yetirməlidir. Çünki regionda artıq çox təhlükəli proseslər gedir və yenə də bunun başında Ermənistan durur".

Təhməz Əsədov