Artıq beynəlxalq aləm də ermənilərin məkrli planlarından xəbərsiz deyil - Ekspert

Tarix: 1 Noyabr 2020 12:18

Biz ilk növbədə unutmamalıyıq ki, düşmənimiz mənfur olması ilə yanaşı, həm də şər-böhtançıdır. Bu baxımdan, fakt budur ki, düşmən tərəfinin Azərbaycan dövlətinə, Ordusuna qarşı səsləndirdiyi hər bir ifadəsinin arxasında riya, məkr dayanır və həmin proses 30 ildir ki, davam edir.

Bu fikirləri Trend-ə "SƏS" qəzetinin baş redaktoru, siyasi ekspert Bəhruz Quliyev terrorçu Ermənistanın dinc şəhərlərimizi, mülki vətəndaşlarımızı atəşə məruz qoyması, eləcə də qarşılarına qoyulan faktları israrla təkzib etməsinə münasibətini açıqlayarkən deyib.

Onun sözlərinə görə, cəbhədə düşdüyü ağır, çıxılmaz vəziyyətini dezinformasiya, feyk xəbərlər üzərində ört-basdır etməyə cəhdlər göstərən işğalçı ölkə rəhbərliyi əsasən, itirilməkdə olan siyasi hakimiyyətini qoruyub-saxlamağa çalışır: "Diqqət yetirin, onlar uzun müddət iddia edirdilər ki, guya Azərbaycan Ordusu dinc şəhərlərdə törədilən partlayışları müxtəlif xarici ölkələrdən gətirlmiş muzdlular tərəfindən həyata keçirir və s. Əlbəttə, bu tamamilə yalandır və böhtandır, çünki bu gün Qarabağımızın işğaldan azad olunması istiqamətində aparılan hərbi əməliyatlar bilavasitə müzəffər Silahlı Qüvvələrimiz tərəfindən reallaşdırılır və həm də düşmən öz iddiasını irəli sürsə də, ortaya heç bir fakt qoya bilmir".

"Digər tərəfdən, yadınızdadırsa, hələ 27 sentyabrdan əvvəl düşmən dövlətin hərbi rəhbərliyi siyasi həyasızlığa, eyforiyaya qapılaraq Gəncə şəhərini vuracaqları ilə bağlı açıq-aşkar təhdidlərlə danışırdı", deyən Bəhruz Quliyevə görə, bu gün yalnız Gəncəni deyil, Bərdəni, Tərtəri və s. dinc şəhərlərimizi raket zərbələrinə məruz qoyan Ermənistan tərəfi bu cinayətlərini üzərindən atmağa çalışır: "Daha bir faktı da nəzərdən keçirək. Ermənistan MN-nin rəsmisi Artsrun Ovannisyan marionet və quldur Qarabağ rejiminin Azərbaycanın şəhərlərini vurmaq hüququna malik olduğunu deyir. Demək ki, əmrlər bilavasitə İrəvandan verilir və bu bəyanatın verilməsi də isbat edir ki, 100-ə yaxın vətəndaşımızın qətlə yetirilməsində İrəvanın hərbi-siyasi dairələri dayanır. Yəni bənzər faktlar çoxdur və onları saymaqla bitməz. Bütün bunlar isə hərbi terror, sabotaj və şantajdır, əlbəttə ki, onların hər biri qeydə alınır və İnşallah qələbəmizdən sonra beynəlxalq məhkəmələrdə onların hər biri cavab vermək məsuliyyətini daşıyacaqlar".

"Əgər nəzərə alarsaq ki, artıq terrorçu Ermənistanın hərbi cinayətlərini bir sıra beynəlxalq təşkilatlar, insan hüquqlarının müdafiəsi ilə bağlı məşğul olan qurumlar bəyanatlar səsləndirir, kassetli bombaların, eyni zamanda konvensiyalarla qadağa olunmuş digər silahların tətbiqini təsdiq edirlərsə, demək həmin faktlar da müəyyən müvafiq dairələrin qeydiyyatına düşürlər", bildirən siyasi ekspert həmçinin bildirib ki, nəinki hazırkı Ermənistan hakimiyyəti - Nikol Paşinyan iqtidarı, həmçinin daha əvvəlki hakimiyyətlər, Serj Sarkisyan, Robert Koçaryan və başqaları da cavab verməyə məhkumdurlar: "Biz yaddan çıxarmamalıyıq ki, düşmənlərimiz əzəldən qansız, terrorçu mahiyyəti daşıyanlar olublar və biz bunu Xocalı, Ballıqaya, Bağanıs Ayrım kimi soyqırımlarında görmüşük. Bu baxımdan, artıq beynəlxalq aləm də ermənilərin məkrli planlarından xəbərsiz deyil. Gah "suriyalı muzdlular", gah "pakistanlı hərbçilər", gah da "F-16 qırcıları" ətrafındakı səs-küylər, hay-haraylar ermənilərin burunlarından o tərəfə keçmir. Hətta onların bəzi media qurumlarındakı pula saıtlmış təlxəkləri də artıq bu yalanları dünyanın ciddi ictimai rəyinə sırımaq imkanlarını itirirlər. Lakin heç nəyə baxmadan Azərbaycanın müzəffər Ordusu öz qələbə və zəfər yürüşünü davam etdirir, həm diplomatik, həm də hərbi cəbhədə uğurlarını qazanır. Biz Ali Baş Komandanımız, böyük sərkərdəmiz İlham Əliyevin ətrafında sıx birləşərək, qələbəmizi tezliklə qeyd edəcəyimizə inanır, həmin qələbəyə doğru addımlayırıq. Düşmənin isə məkri, şər-böhtanı, şantajı onun məğlubiyyət reallığını artıq kifayət qədər ortaya qoyub".