''Erməni lobbisi bütün yollarla Rusiyaya Paşinyanın devrilməsi üçün təzyiq edir''

Tarix: 18 Dekabr 2020 17:00

"Dünən Ermənistanın keçmiş prezidenti Robert Koçaryanın Moskvaya üç günlük səfər etməsi ilə bağlı xəbər yayılıb. Səfərin məqsədinin Koçaryanın dekabrın 18-də, yəni, bu gün İdarə Heyətinin üzvü olduğu "AFK Sistema" Rusiya İnvestisya Kompaniyasının iclasında iştirak etmək olduğu vurğulanıb. Bu xəbərdən görünür ki, Koçaryanın Moskvaya səfərinin məqsədi şəxsi xarakter daşıyır".

Bunu Sonxeber.net-a açıqlamasında siyasi ekspert Fərid Əkbərov bildirib. 

O, Ermənistanda baş verən hadisələr, baş nazir Nikol Paşinyanın istefaya getməsi tələbləri fonunda Koçaryanın Moskvaya səfər etməsinin təbii ki, maraq doğurduğunu söyləyib:

"Bildiyiniz kimi, Ermənistandakı kriminal Qarabağ klanının liderilərindən olan Robert Koçaryan birmənalı olaraq Rusiyanın adamıdır. Serj Sarqsyandan fərqli olaraq Koçaryanın bütün biznesi Rusiyada yerləşir. Sarqsyan isə erməni xalqından oğurladığı sərvəti Qərb ölkələrində saxlamağa daha çox üstünlük verib. Ona görə də, bu mənada Koçaryanın Moskvaya səfəri heç də təəccüb doğrumur". 

F.Əkbərov Koçaryanın Moskvada keçiriləcəyi görüşlərdən konkret nəticələr çıxmayacağını hesab etdiyini vurğulayıb:

"Bu səfər çərçivəsəində şəxsi məsələlərdən əlavə Koçaryanın Rusiyadakı erməni diasporu, iş adamları ilə görüşü də böyük ehtimalla planlaşdırılır. Çox güman ki, erməni lobbisi ilə sıx təmasda Rusiyanın siyasi "isteblişment"inin üzvləri ilə də görüşlər və məsləhətləşmələr keçiriləcək. Lakin bu görüşlərdən konkret nəticələr çıxacağını fikirləşmirəm. Çünki Moskva, xüsusi ilə də prezident Vladimir Putin tərəfindən üçtərəfli sazişdən sonra səslənən bəyanatlarda Ermənistanın baş naziri Nikol Paşinyana dəstək ifadə olunub. Bu dəstək eyni zamanda dövlətin mövqeyini ifadə edən bir sıra parlamentarilərin dilindən də səsləndirilib. Lakin bununla belə, Rusiyadakı erməni lobbisi, xüsusi ilə də bu lobbinin təsirində olan media vasitəsi ilə Paşinyana qarşı kampaniya davam etməkdədir. Erməni lobbisi bütün yollarla Rusiya siyasi rəhbərliyinə Paşinyanın devrilməsinə yaşıl işıq yandırmaq üçün təzyiq edir. Bunu təbii ki, erməni lobbisi böyük nüfuza malik olduğu media vasitəsi ilə edir. Buna nə qədər nail olacaqlarını yaxın zamanlarda görəcəyik".

Siyasi ekspert  Koçaryanın hələ hərbi əməliyyatların ilk günlərinə Moskvaya səfər etməyi planlaşdırdığını da xatırladıb:

"O zaman bu səfər baş tutmamışdı. Daha sonradan Koçaryan səfərin baş tutmamasına görə Paşinyanı günahlandırmışdı. Məndə olan məlumata görə, həmin zaman heç rəsmi Moskva da qeyri-formal olsa belə, Koçaryanı qəbul etməyə razı olmayıb, yəni ki, Kreml Koçaryanla görüşün mənasız olduğunu Qarabağ klanının diqqətinə çatdırıb. Çox güman ki, bu dəfə Koçaryan Rusiyanın siyasi estableşmentinin erməniləri dəstəkləyən qolu ilə görüşməyə nail olacaq. Bu görüşlərə Paşinyanın hakimiyyətdən getməsi, hakimiyyətə rusiyapərəst qüvvələrin gəlməsi əsas müzakirə mövzusu olacaq. Lakin bu Paşinyanın yaxın vaxtlarda istefa verəcəyi anlamına gəlmir. Çünki erməni cəmiyyəti hakimiyyətin yenidən Qarabağ klanının əlinə keçməsinə bundan sonra heç vaxt razı olmayacaq. Əlavə edim ki, Paşinyanın sosial dayaqları hələ də var. Baxmayaraq ki, etiraz aksiyalarının sayı gündən-günə artır. Lakin bu aksiyaları ilhamlandıran qüvvə və mənbələrin haradan qaynaqlandığı məlumdur. 

Siyasi ekspert Ermənistandakı etirazların ilham mənbəyinin təbii ki, Rusiyadakı erməni lobbisi olduğunu qeyd edib:

"Lakin 44 günlük müharibənin Azərbaycanın qələbəsi ilə başa çatması onu da göstərdi ki, Rusiyadakı erməni lobbisinin fövqəl gücə malik olması "mif"dir. Və bu "mif" artıq yerlə yeksan olub. Böyük nüfuza malik olmasına baxmayaraq erməni lobbisinin Azərbaycana qarşı həm informasiya siyasəti, həm də Rusiyanın dövlət strukturlarına və siyasi dairələrə təsiri öz bəhrəsini vermədi. Kreml sonda öz milli maraqlarını üstün tutdu. Qarabağla bağlı üçtərəfli bəyanat və daha sonrakı proseslər Rusiyadakı erməni lobbisinin deyil, məhz Moskvanın milli maraqlarına uyğundur. Bu gün Moskvanın milli maraqları hələ ki, Paşinyanın hakimiyyətdə qalmasını tələb edir. Çünki Moskva hələ Ermənistanda kimi hakimiyyətə gətirə biləcəyi ilə bağlı konkret namizədini müəyyənləşdirməyib. Ona görə də, hesab edirəm ki, Paşinyan hələ bir müddət hakimiyyətdə qalacaq".

Təhməz Əsədov