Sahil Babayev: “Son iki ildə əməkhaqqı fondu 77-78 faiz artıb”

Tarix: 23 Dekabr 2020 13:44

"Əmək və Əhalinin Sosial Müdafiəsi Nazirliyi əhalinin çox böyük qismi ilə əməkdaşlıq edir. Ölkə Prezidentinin bu sahədən əsas gözləntisi də Azərbaycanda aztəminatlı ailələlərə məşğulluq, əmək müqaviləsi sahəsində, eyni zamanda əlilliyi olan, övladlığa götürülən şəxslər və digər müxtəlif geniş sosial kontingentə Nazirliyin xidmət göstərməsidir".

Sonxeber.net APA-ya istinadən bildirir ki, bunu 10-cu Beynəlxalq "Caspian Energy Investment" Forum və 5-ci Beynəlxalq "Caspian Business Award 2020" mükafatının təqdimetmə mərasimində Əmək və əhalinin sosial müdafiəsi naziri Sahil Babayev bildirib. Onun sözlərinə görə, bu istiqamətdə biznes nümayəndələri ilə də çox aktiv işləyirlər: "Son iki ildə aparılan genişmiqyaslı islahatlara biznes nümayəndələri də çox müsbət, məsuliyyətlə yanaşıblar. Təkcə son iki ildən artıq bir dövr ərzində ölkədə əmək müqavilələrinin sayı 300 mindən çox, əməkhaqqı fondu 77-78 faiz artıb. Burada əsas lokomativ biznes dairələrimiz olub. Onlar həm qeyri-formal iqtisadiyyatın azaldılması, həm əmək müqavilələrinin, əmək haqqı fondunun leqallaşdırılması, ümumilikdə bütün biznesin, iqtisadiyyatın sağlam təməllər üzərində qurulması çağırışlarına çox müsbət cavab veriblər.

Eyni zamanda biznes nümayəndələri bizimlə çox sıx işləyərək sosial tərəfadaşlıq missiyasını da həyata keçiriblər. Bunu xüsusilə pandemiya şəraitində çox bariz gördük. Birinci vitse-prezidentin çağırışına qoşulan şirkətlər 100 mindən çox ailəyə ərzaq yardımı ediblər. Eyni zamanda Vətən Müharibəsi dövründə biznes nümayəndələri dövlətlə yanaşı birgə  bir çox layihələr həyata keçiriblər. İnanıram ki, biznes nümayəndələrimiz işğaldan azad olunmuş ərazilərimizin bərpası və dirçəlişinə də çox böyük dəstək göstərəcəklər".

Nazir qeyd edib ki, Azərbaycan Prezidenti də onların bu vətənpərvərliyini, sosial məsuliyyət prinsiplərini hər zaman vurğulayır: "İnanıram ki, növbəti dövr üçün də bütün islahatlarda biznes nümayəndələrinin də töhfələri, rəylərini nəzərə alınacaq. Necə ki,  qanunvericiliyə ən son dəyişikliklərin hər biri biznes dairələri ilə geniş müzakirə nəticəsində hazırlanıb. Çünki istənilən hökumətin niyyəti ondan ibarətdir ki, ölkədə iqtisadiyyat inkişaf etsin, məşğulluq təmin olunsun. Məşğulluq və iqtisadi inkişaf sosial rifahın, ölkənin gələcəyinin təminatıdır. Əsas lokomativ hər zaman özəl sektor olub. Azərbaycan qısa bir dövr ərzində ümumdaxili məhsulunun 80 faizini özəl sektorun hesabına istehsal edir. Bu özü də böyük göstəricidir. İnanıram ki, biz xüsusilə məşğulluq, əmək münasibətləri və eyni zamanda sosial məsuliyyət sahəsində biznes dairələri ilə əməkdaşlığımızı genişləndirəcəyik".

Qeyd edək ki, Sahil Babayevə 5-ci Beynəlxalq "Caspian Business Award 2020" mükafatı təqdim olunub.