''Vaksinasiyada gecikmədən iştirak etmək lazımdır''

Tarix: 16 Avqust 2021 23:06

Tibb işçiləri olaraq ölkəmizə yeni növ koronavirus (COVID-19) infeksiyası əleyhinə ilk vaksin gəldiyi zaman - bu, Çinin "Sinovac" şirkətinin "CoronaVac" vaksini idi - həmin peyvəndi vurdurduq. Hazırda növbəmizi gözləyirik ki, üçüncü doza vaksini qəbul edək. Bu zaman digər növ peyvəndlərə də müraciət etmək imkanımız var. Gücləndirilmiş doza bizim üçün çox vacibdir. Çünki səhiyyə işçiləri hər zaman xəstələrlə kontaktda olurlar. Onlar arasında asimptomatik xəstələr də, başqa şikayətlərlə gəlib COVID-19-a yoluxduğu müəyyənləşənlər də olur. Bütün bunları nəzərə alaraq vaksinasiyanın hansı peyvəndlə edilməsindən asılı olmayaraq, vaxtında aparılması vacibdir. Vətəndaşlardan vaksinasiyadan sonra özünü pis hissetmə, halsızlıq, qolunda ağrı ilə bağlı müraciətlər olur. Vaksinasiya zamanı bədənə zəiflədilmiş virus yeridilir və qeydə alınan hallar gözləniləndir. Bunlar yan təsirlərdir. Onların olması vaksinin keyfiyyətsiz olması demək deyil.

Sonxeber.net AZƏRTAC-a istinadən bildirir ki, bunu pediatr-infeksionist Aytən Ziyadova deyib.

Mütəxəssis bildirib: "Xroniki xəstəliklərdən əziyyət çəkənlər və yaşı 60-dan yuxarı olanlar birbaşa risk qruplarıdır. Araşdırmalar nəticəsində müəyyənləşib ki, yaşı 60-dan yuxarı olanlar, xüsusilə kişilər COVID-19-a yoluxan zaman onların həyatı təhlükəsi digərlərinə nisbətən çoxdur. Bu qənaətə araşdırmalar əsasında gəlinib. Peyvəndlər də tədqiqatlar əsasında istehsal olunur. Araşdırmaların birində də qeyd olunub ki, COVID-19-un o qədər ştammı ola bilər ki, latın əlifbasında hərf çatmaya bilər. Çünki koronavirus mutasiyaya uğrayan virusdur. Onun qarşısı yalnız vaksinasiyadan sonra alına bilinəcək.

COVID-19-un "delta" ştammı heç də yüngül variant sayılmır. "Delta" ştammı yüksək yoluxduruculuqla yanaşı, yüksək öldürücülüyə də malikdir. Qonşu ölkələrdəki, o cümlədən region ölkələrindəki ölüm sayına baxsaq, bunu aydın şəkildə görərik. Bəzi vətəndaşların qaydalara və vaksinasiyaya laqeyd münasibəti davam edərsə, ölkəmizdə də bu hal gözləniləndir. Ona görə də əhalini vaksinasiyada aktiv iştiraka səsləyirik. Çox təəssüf ki, vaksinasiya prosesi ilə əlaqədar müəyyən qədər xoşagəlməz məqamlar qeydə alınır. Belə halların baş verməməsi hər birimizin məsuliyyətində olmalıdır. Hər birimizin üzərinə düşən bir vəzifə var: vaksinasiyanın vaxtında aparılması. Məlumdur ki, yoluxma halları daha çox toy və yas mərasimlərində qeydə alınır. İş yerlərində işçilər maskadan istifadə edir, məsafəni gözləyirlər. Lakin tanışlar, qohumlar bir araya gələndə bu, mümkün deyil. Özümüzün, əzizlərimizin, doğmalarımızın həyatını riskə atmaq istəmiriksə, qızıl qaydalara əməl etməli və vaksinasiyada iştirak etməliyik. Bir məqamı xüsusi vurğulamaq istərdim: vaksinasiyada gecikmədən iştirak etmək lazımdır".