Çində əhaliyə vurulan COVID-19 peyvəndinin sayı 2 milyard dozanı ötüb

Tarix: 27 Avqust 2021 21:06

Çində COVID-19 infeksiyasına qarşı vaksinasiya prosesinin gedişində əhaliyə vurulan peyvəndin sayı 2 milyard dozanı ötüb.

Milli.Az AZƏRTAC-a istinadən bildirir ki, bu barədə Çinin Səhiyyə Məsələləri üzrə Dövlət Komitəsi məlumat yayıb.

Çin əhaliyə vurulan peyvənd dozasının sayına görə dünyada birincidir.

Ötən ilin dekabrında başlayan vaksinasiya prosesinin ilk mərhələsində xüsusi risk qrupundan olanlara peyvənd vurulub. Fevralda isə könüllülük prinsipi əsasında kütləvi vaksinasiyaya start verilib. Ölkə üzrə əhaliyə vurulan peyvənd dozasının sayı cəmi 25 günə 100 milyondan 200 milyon dozaya, 16 günə isə 200 milyondan 300 milyona yüksəlib. İyunun 19-da bu rəqəm bir milyarda çatıb. Orta hesabla sutkada 20 milyon doza peyvənd vurulur. Əhalinin yarıdan çoxu COVID-19 infeksiyasına qarşı artıq tam peyvəndlənib.

Qeyd edək ki, Çinin səlahiyyətli qurumları ilin sonunadək əhalinin 70-80 faizini koronavirus əleyhinə peyvəndləməyi hədəfləyib. Vaksinasiya prosesində yerli "Sinopharm" və "Sinovac" şirkətlərinin istehsalı olan ikidozalı 3 inaktiv, habelə "CanSino" şirkətinin birdozalı rekombinant adenovirus peyvəndindən istifadə olunur.

Çin indiyədək 100-dən çox ölkəyə ümumilikdə 770 milyon dozadan çox COVID-19 peyvəndi təqdim edib. Xaricə göndərilən vaksinlərin əsas hissəsi 50-dən çox ölkəyə kommersiya prinsipi əsasında ixrac olunub. Müəyyən miqdarda vaksin isə Çin dövləti tərəfindən 80 ölkəyə yardım kimi təqdim edilib.

Çin şirkətləri dünyada COVID-19 vaksinlərinə artan tələbatı ödəmək üçün illik istehsal gücünü 5 dozaya çatdırıblar. Bundan başqa, Çin şirkətləri bəzi ölkələrdə tam və ya qismən vaksin istehsalına da başlayıb.

Milli.Az