Bu il 60 subartezian quyusu qazılıb - VİDEO

Tarix: 31 Avqust 2021 17:32

Quyular vasitəsilə 2000 ha ərazi suvarılır

Sonxeber.net Real TV-ə istinadən bildirir ki, Beyləqan rayonunda son illər qazılan subartezian quyuları sakinlərin və fermerlərin suya olan tələbatını demək olar ki, tam şəkildə ödəyir. Quyuların saz vəziyyətdə saxlanılması, davamlı fəaliyyətinin təmin olunması Beyləqan Subartezian Quyularının İstismarı İdarəsi tərəfindən həyata keçirilir. İdarənin balansında 940 ədəd subartezian quyusu var ki, onlardan 119 ədədi Beyləqan rayonunun payına düşür.

Qazılan subartezian quyuları rayon sakinləri və fermerlərin işini olduqca asanlaşdırıb. Quyuların qazıldığı ərazilərdə istər içməli, istərsə də suvarma suyuna olan təlabat tam ödənir.

İstifadədə olan subartezian quyularında mütəmadi təmir işləri aparılır. Quyuların dərinlik nasosları sıradan çıxdıqda, idarənin əməkdaşları tərəfindən quyuya baxış keçirilir və nasoslar təmir olunur. Rayonda əkilən pambıq, yonca, bostan-tərəvəz bitkiləri, o cümlədən sakinlərin həyətyanı sahələri mütəmadi olaraq suvarılır.

İdarənin balansında olan 940 ədəd quyudan 327 ədədi işğaldan azad olunmuş rayonların ərazilərindədir. Onlardan 67-si birinci Qarabağ müharibəsi vaxtı münaqişə nəticəsində dağıdılıb. Hazırda 546 ədəd quyu istismardadır. Bundan başqa Beyləqanda-119, Füzulidə-178, Cəlilabadda-106, Masallıda-63, Xocavənddə-36, Yardımlıda-10, Biləsuvarda-5, Lənkəran və Lerikdə-7, Astarada-8, Cəbrayılda-4, İmişlidə isə 1 subartezian quyusu su istifadəçilərinin xidmətindədir. Qeyd edək ki, işğaldan azad olunmuş rayonlarda 9 ədəd subartezian quyusunun- 6 ədədi Füzuli, 3 ədədi isə Cəbrayıl rayonunda olmaqla əsaslı təmiri planlaşdırılıb.