ABŞ-ın Ermənistan səfiri özünü və huşunu itirib

Tarix: 22 Sentyabr 2021 10:38

44 günlük Qarabağ Zəfəri Azərbaycanın tək regionda deyil, ətraf ölkələrdə də söz sahibinə çevirib. Beynəlxalq aləm 30 ildir beynəlxalq təşkilatların, fövqəldövlətlərin edə bilmədiyini Azərbaycan xalqının cəmisi iki ay ərzində yerinə yetirdiyini gördü və qəbul etdi. Minsk Qrupu kimi üzərinə düşən vəzifəni yerinə yetirə bilmək iqtidarında olmayan qurumu tarixin arxivinə atmış oldu. Və bununla barışmaq istəməyən həmin quruma daxil olan ölkələr indi statusdan dəm vurur, cəfəngiyyat dolu bəyanatlar verir.

Bu sırada ABŞ-ın Ermənistandakı səfiri Linn Treysi xüsusi canfəşanlıq göstətir. Erməni lobbisinin təsiri altında olan səfir istirahət vaxtını belə əzəli Azərbaycan torpağı olan Zəngəzurda keçirir. Sonra da erməni konyakının təsiri altında cəfəng bəyanatlar səsləndirir. Onun son bəyanatına diqqət yetirək. Regiondakı yeni reallıqları nəzərə almayan səfir artıq neçənci dəfədir ki, Qarabağ münaqişəsnin həll olunmadığını iddia edərək, sərsəm fikirlər səsləndirir. Faktiki olmayan məsələlərdən bəhs edən səfir diplomatik etikadan kənar fikirlərlə yadda qalıb. Bu şəxs məgər bilmir ki, onun da ölkəsinin üzv olduğu və imza atdığı BMT qətnamlərini Azərbaycan təkbaşına həyata keçirib. Niyə axı öz ölkəsinin qəbul etdiyi sənədə hörmətsiz yanaşır? Bu qədər qərəz, ikili standart olmaz axı. Ölkə prezidenti İlham Əliyev dəfələrlə də qeyd edib ki, status məsələsi artıq mövcud deyil. Rəsmi Bakı "Dağlıq Qarabağ" inzibati ərazi bölgüsünü birdəfəlik ləğv edib. Və heç bir zaman da bərpa etməyəcək. Yoxdur belə bir bölgü və səfir də bunu anlamalıdır. Səfir görünür, Roma papasından da artıq katolik olmaq fikrinə düşüb. Məgər unudub ki, Ermənistan-Azərbaycan münaqişəsi 2020-ci il noyabrın 10-da Azərbaycan, Rusiya prezidentləri və Ermənistanın baş nazirinin birgə bəyanatı imzalaması və kapitulyasiya aktını qəbul etməsi ilə bitib. Azərbaycan Qələbə qazanıb və bu gün Dağlıq Qarabağ adlanan ərazi subyekti, münaqişə və digər bu kimi məsələlər gündəmdə deyil. İndi əsas diqqət yekun sülh müqaviləsinin imzalanması, sərhədlərin demarkasiyası və delimitasiyası, kommunikasiyaların açılması, sülh müqaviləsinin imzalanması və regionda əməkdaşlıq mühitini formalaşdırmaqla onun inkişafına təkan verməkdir.

Səfir bilməlidir ki, əgər həqiqətən erməni xalqına firavan həyat və xoş günlər istəyirsə, mövcud reallıqla barışmalıdır. Amerikalı səfir isə bütün bunları görmürmüş kimi reallıqdan uzaq fikirlər səsləndirir.

Bundan yalnız bir qənaətə gəlmək olar - ABŞ bölgədə sülhün bərqərar olmasında maraqlı deyil. İnanaq ki, bu mövqe səfirin, müəyyən dairələrin, erməni lobbisinin maliyyəsinin mövqeyidir. Səfirin diqqətinə onuda çatdıraq ki, ABŞ münaqişənin mövcud olduğu 30 il ərzində istər güc mərkəzi, istərsə də həmsədrlərdən biri kimi onun ədalətli həlli istiqamətində bir dəfə də olsun əməli addım atmayıb. Vaşinqtonun bütün cəhdləri sadəcə məsələnin konservasiyasına yönəlmişdi. Təsadüfi deyil ki, ATƏT Minsk Qrupunun Amerikadan olan nümayəndələri orta səviyyəli, heç bir səlahiyyətə malik olmayan, hətta öz rəhbərləri tərəfindən belə qəbul edilməyən şəxslər olublar.

Bu gün Amerika səfirinin belə bəyanatlar verməsi onu göstərir ki, Vaşinqton erməni lobbisinin maraqlarını Cənubi Qafqaz regionuna daşımağa cəhd göstərir. 30 illik passiv müşahidəçi olan ABŞ-ın bu gün belə mövqe nümayiş etdirməyə, tələblər irəli sürməyə mənəvi haqqı yoxdur. ABŞ Suriya, Liviya, Əfqanıstandakı iflasından, ən yaxın müttəfiqlərindən biri olan Fransaya xəyanətindən sonra bu tipli iddialar irəli sürmək haqqını itirib. ABŞ bu mövqeyini davam etdirəcəyi təqdirdə, Azərbaycan hər hansı səviyyədə ATƏT Minsk Qrupu formatında keçirilən görüşlərdə imtina etməlidir.

Alpər İsmayıl