“YAP Əli”dən aldığı pul, işdə 500-1000 manat paylaması və... - Sabiq icra başçısından ETİRAFLAR

Tarix: 13 Noyabr 2021 20:36

Rüşvət almaqda, dövlət büdcəsindən ayrılan pulları mənimsəməkdə təqsirləndirilərək həbs edilən və 7 il 6 ay müddətinə azadlıqdan məhrum edilən Yevlax Şəhər İcra Hakimiyyətinin sabiq başçısı Qoca Səmədovun cinayət işi üzrə bəzi təfərrüatlar və özünün ifadəsinin detalları məlum olub.

Sonxeber.net musavat.com-a istinadən bildirir ki, elan edilmiş xeyli sayda epizod üzrə özünü təqsirli bilən Qoca Səmədov əməllərini etiraf edib. Amma onu da qeyd edib ki, bir çox hallarda öz işçiləri tərəfindən də aldadılıb.

Bildirək ki, Q.Səmədov 8 il Yevlaxın başçısı olsa da ona qarşı irəli sürülən ittihamlar əsasən 2017-2019-cu illəri əhatə edir.

İstintaqda dindirilən zaman "Şəhidlər Fondu"na ayrılan vəsaitin mənimsənilməsidən danışan Səmədov deyib ki, ləğv olunan fond çoxsaylı xahişlər nəticəsində 2013-cü ildə yenidən yaradılıb. Amma Qarabağ əlilləri və şəhid ailələri ilə yanaşı imkansız, xəstə adamlar üçün də fəaliyyət göstərib. O, heç bir idarə və müəssisə rəhbərindən fonda pul ödəməsini tələb etmədiyini söyləyib.

Xeyirxah əməllərinə də toxunan Səmədov hətta icra hakimiyyətinin binası qarşısında ehtiyacı olan adamlara 500-1000 manat pul verdiyi vaxtların olduğunu da deyib.

Sabiq başçsı 2-3 dəfə iş üçün müraciət edən adamları iclas zalında yığaraq yalandan gəlib sosial yardım üçün müraciət etməmələrini də istəyib.

Qoca Səmədov işə çıxamayan 94 nəfərə maaş yazıldığını etiraf edib. Amma bildirib ki, işçilərin sayının daha çox göstərilməsindən xəbəri olmayıb. Baş mühasib İlhamə və digər işçilər onu aldadaraq rəqəmləri şişirdib.

"Dərələyəz" MMC-nin direktoru və rayon ərazisində sahibkarlıq fəaliyyəti ilə məşğul olmaq üçün obyekt tikmək istəyən şəxslərdən, ümumlikdə 36 nəfərdən ayrı-ayrı vaxtlarda 1200-8000 min manat civarlarında rüşvət alındığını da təsdiqləyib.

O, ayrı-ayrı MMC-lərə pullar ayıraraq nağdlaşdırdığını, həmin pulun 230 min manatını icra hakimiyyətinin binasının bərpasına xərclədiyini deyib.

Qoca Səmədov Yevlax şəhəri hava limanından Yevlax şəhərinə gəlmək üçün qəsəbənin küçələrin kənarlarında divar düzəltdirdiyini, 30-a yaxın evin üstünü, 60-70 ədəd evin darvazasını dəyişdirdiyini, Çənlibeldən-Nizami prospektinə qədər olan yolda 5 dəfə asfalt yol çəkdirdiyini, Yevlax şəhərinin şoranlıq hissəsində Səməd Vurğun parkı saldığını, fiziki qüsurlu şəxslər üçün 3 mərtəbəli bina tikdirdiyini deyib. Amma bu işlərə nə qədər pul xərclədiyini dəqiq xatırlamadığını söyləyib.

İşlədiyi müddətdə Yevlax rayonuna dövlət büdcəsindən 20 milyon vəsait ayrıldığını deyən Səmədovun sözlərinə görə həmin vəsait icra hakimiyyətinin və tabeçilikdə olan qurumların saxlanılması, icra hakimiyyətinə ayrıca avadanlıqların alınması, cari təmirə ayrılıb.

Rayon ərazisində binalar üzlənən zaman fəhlələrin sayının bilərəkdən artırıldığını, onlara kart açıldığını da etiraf edən sabiq başçsı Ruhin adlı adamının ətraf rayonlardakı bankomatlardan həmin pulu nağdlaşdıraraq ona verdiyini söyləyib.

O da məlum olub ki, Qoca Səmədov əsas təmir-tikinti işlərini özünə yaxın olan "Dərələyəz MMC" vasitəsi ilə həyata keçirib.

Bəzi rəqəmləri həyəcanlı olduğuna görə xatırlamadığını da deyən Səmədov bildirib ki, kartlardan çıxarılan pulların müəyyən hissəsi də rayonun digər çatışmazlıqlarına xərclənib.

O vurğulayıb ki, bir çox işləri özü görüb, amma sonradan həmin məbləğləri müxtəlif yollarla nağdalaşdıraraq götürüb.

Sahibkarlıq fəaliyyəti ilə məşul olmaq istəyən şəxslərdən isə Q.Səmədovun göstərişi ilə müəyyən abadlıq işlərinin görülməsi adı ilə pul alınıb. Səmədov həmin şəxslərdən dövlət rüsumlarından əlavə müəyyən miqdarda pul almasını tapşırdığını etiraf edib. Tikinti aparmaq istəyənlərdən 1200-8000 min manat məbləğində pulları "hörmət" kimi alınıb.

Qoca Səmədov işə adam düzəltmək üçün Əli adlı şəxsdən pul adlığını da etiraf edib : "Mən onu "YAP Əli" kimi tanımışam və münasibətlərimiz yaxşı olub. Əli xahiş etdi ki, yaxın tanışını İcra Hakimiyyətində işə düzəldək.

Fərid adlı şəxsi işlə təmin etmək üçün 8 min, Tural adlı gənci isə işlə təmin etmək üçün 10 min aldım. Onlar İcra Hakimiyyətinin İctimai, siyasi və humanitar məsələləri üzrə şöbəsinə mütəxəssis qismində işə qəbul edilib".

"Müharibə Veteranları və Şəhid Ailələri" İctimai Birliyinin yardım fonduna Yevlax rayon müəssisə və təşkilatlarının işçilərinin aylıq vəzifə maaşından könüllülük əsasında 1% tutulduğunu deyən Q.Səmədov bildirib ki, birliyə əvvəllər icra hakimiyyətinə baş məsləhətçi işləmiş Mirzəalı Həsənov və digər şəhid yaxınları nəzarət edib. Yardım üçün ayrılan pullardan hər ay nağdalaşdırılaraq icra başçısına 4 min manat verilib.

Məlumata grə Q.Səmədov Yevlax Şəhər Təhsil şöbəsinin metodisti vəzifəsində işləyən şəxsin İcra Hakimiyyətinin İctimai-siyasi və humanitar məsələlər şöbəsinə baş məsləhətçi vəzifəsinə təyin edilməsi üçün 8000 manat və digər məbləğlərdə rüşvət alıb.

Q.Səmədov onu da deyib ki, aldığı rüşvətlərlə Yevlax şəhəri Pişəvari küçəsində oğlunun adına sənədləşdiriləcəyini uşaq bağçasının tikintisinə xərcləyib. Bağçanın tikintisinə 400 min manat xərcləsə də aldığı rüşvətlərdən ona heç nə qalmayıb və əlavə də özü pul xərcləyib.

Bir çox müəssisələrdə işçilərin sayının şişirdilməsi haqda suallara təkrar cavab verən Q.Səmədov bunları deyib: "İşçi sayı artırılmasını demişəm. Amma bildirmişəm ki, bu şəxslərin sayı çox olmasın. Etibar və İlhamə isə hər dəfə mənə pul gətirəndə dediklərindən əlavə şəxslərin olmadığını bildirirdilər. İndi aydın olur ki, əslində say çox olub. Yerdə qalan hissədən məlumatım olmayıb. Həmin vəsaitlər mənə çatmayıb. Bu qədər çox işçinin formal olaraq rəsmiləşdirilməsinə dair nə Etibara, nə də İlhaməyə göstəriş verməmişəm. İndi onların məni aldatdığını başa düşürəm".

Çox peşman olduğunu deyən Qoca Səmədov üzərinə həbs qoyulmuş əmlakın zərərrin ödənilməsi kimi qəb ul edilməsini xahiş edib.