ÜST nümayəndələri hesab edirlər ki, “omikron” koronavirusun sonuncu variantı olmayacaq

Tarix: 7 Yanvar 2022 21:26

COVID-19 əleyhinə vaksinasiyanın hazırki tempi və vaksinlərin qeyri-bərabər paylanması ilə 2022-ci ilin ortalarına 100-dən artıq dövlət əhalisinin 70 faizini peyvənd edə bilməyəcək. Sonxeber.net AZƏRTAC-a istinadən bildirir ki, bu barədə ÜST-nin Baş direktoru Tedros Qebreyesus Cenevrədə keçirdiyi brifinqdə deyib.

Onun həmkarları, jurnalistlərin suallarını cavablandırarkan, koronavirusun yüksək yoluxuculuq qabiliyyətinə malik olan "omikron" ştamının sonuncu olacağına şübhə etdilər. Tedros Qebreyesusun sözlərinə görə yaranmış vəziyyətin əsas səbəbi vaksinlərin ədalətsiz paylanılmasıdır. "Vaksinlərə əlçatanlıqda və ümumilikdə səhiyyə sahəsində xidmətlərə qeyri-bərabərlik ötən ilin ən böyük uğursuzluğu oldu. Vaksinlərə aid qeyri-bərabərlik insanların həlak olmasına, iş yerlərinin itirilməsinə gətirib çıxarır və dünya iqtisadiyyatının bərpasına ziyan vurur", - deyə Tedros Qebreyesus bildirib.

Onun sözlərinə görə, "alfa", "beta", "delta", "qamma" və "omikron" variantlarına, qismən, vaksinasiyanın aşağı səviyyəsi səbəb oldu.

Keçən həftə pandemiya başlayandan bəri COVID-19-a yoluxmada ən yüksək göstərici qeydə alınmışdı. "Bu çox güman ki, real göstərici deyil, çünki təqdim edilən rəqəmlər bayramlar zamanı testləşmədə gerilməni, özünü testləşdirmədə təsdiq edilməmiş müsbət nəticələrin sayını və dünyada bəzi halları gözə almayan nəzarət sisteminin həddindən çox yüklənməsi amilini əks etdirmir", - deyə ÜST rəhbəri bildirib.

ÜST-nin Baş direktorunun sözlərinə görə, "omikron"un "delta"ya nisbətən xüsusilə də peyvənd olunmuş insanlarda o qədər də ağır keçmədiyinə baxmayaraq, bu o demək deyil ki, onu "yüngül" variantlar kateqoriyasına aid etmək lazımdır.

"Əvvəlki variantlar kimi "omikron" da insanların xəstəxanaya yerləşdirilməsinə və ölüm hallarına gətirib çıxarır. Əslində, "yoluxma hallarının "sunamisi" o dərəcədə güclüdür və elə sürətlə hərəkət edir ki, bütün dünyada səhiyyə sistemlərinin həddindən artıq yüklənməsinə gətirib çıxarır", - deyə Tedros Qebreyesus bildirib.

Onun sözlərinə görə xəstəxanalar həddindən artıq dolu olur, orada kifayət qədər tibbi heyət mövcud deyil. Pasiyentlərin vaxtlı-vaxtında yardım ala bilmədiklərinə görə nəinki COVID-19, digər xəstəliklərdən və xəsarətlərdən də qarşısı alına bilən ölüm hallarından qaçmaq mümkün olmur.

ÜST rəhbəri bütün dünyada vaksinasiyanın miqyasını artırmağa çağırıb. "Vaksinlərin indiki paylanma tempi ilə 109 ölkə 2022-ci il iyulun əvvəlinə əhalisinin 70 faizlik peyvəndlənməsini təmin edə bilməyəcək", - deyə ÜST rəhbəri bildirib ki, bu gün dünyada 36 ölkə əhalinin hətta 10 faizini belə peyvənd edə bilməyib.

Tedros Qebreyesusun sözlərinə görə, birinci nəsil vaksinlər xəstəxanaya yerləşdirmə hallarının azalmasına əhəmiyyətli töhfə verir.

ÜST-nin aparıcı epidemioloqu Mariya van Kerkhove bildirib ki, dünyada COVID-19-a yoluxma hallarının sayı iki həftə ərzində 71 faiz artıb. Mariya Kerkhove təəssüflə bildirib ki, "omikron" koronavirusun sonuncu variantı olmayacaq. Virus mutasiya etməkdə davam edir, bəzi ölkələrdə isə "delta" ilə rəqabət aparır, hələ məlum deyil ki, hansı variant qalib gələcək. Hazırda "delta" variantının 30 mutasiyası aşkar edilib.

ÜST-nin fövqəladə hallar proqramının direktoru Maykl Rayan da bildirib ki, bu gün "omikron"un sonuncu variant olacağını demək hələ çox tezdir, xüsusilə də milyardlarla insanın peyvənd olunmadığı şəraitdə. "Omikron"un sonuncu variant olacağına ümid etmək istəyərdik, lakin mənə elə gəlir ki, indiki zamanda bunun ehtimalı çox aşağıdır. Biz virusa yoluxmada və onun ötürülməsində yüksək dərəcəni müşahidə edirik", - deyə Maykl Rayan vurğulayıb. O əlavə edib ki, yeni variantların yaranması ilə bağlı çoxsaylı təhdidlər mövcuddur.