Xalq artistimizdən rus filmi ilə bağlı açıqlama: “Suyu da üfürə-üfürə içir...”

Tarix: 18 Fevral 2022 17:00

Rusiyanın Birinci Kanalında Azərbaycanın məşhur aktyorlarının iştirakı ilə "Yeniçəri" adlı irimiqyaslı tarixi serialın premyerası keçiriləcək. Filmdə rol alan məşhur aktyorlarımızdan biri də Azərbaycanın Xalq artisti Pərviz Məmmədrzayevdir. 

Sonxeber.net xəbər verir ki, Pərviz Məmmədrzayev Bizim.Media-ya film haqqında təəssüratlarını bölüşüb. Onun sözlərinə görə, ilk başlarda pandemiyaya görə filmin çəkilişlərində çətinliklər yaranıb:

"Yeniçəri" çoxseriyalı film 2019-cu ildə çəkilib. Postprodakşn dövrü pandemiya zamanına təsadüf etdi deyə, bir sıra çətinliklər təbii ki, olub. Ona görə də filmin tamaşaçılara təqdim olunması bir qədər uzun çəkdi. Film çox böyük profesionallıqla çəkilirdi. İş elə qurulmuşdu ki, texniki və yaradıcı heyətin hamısı dəqiq mexanizmlə işləyirdilər".

Xalq artisti serialda digər azərbaycanlı aktyorlarımızın da rol aldığını qeyd edərək canlandırdıqları obrazları haqda məlumat verib:

"Azərbaycandan çəkilən tək aktyor mən deyildim. Aktyor Kamran Ağabalayev də əsas rollardan birinə çəkilirdi. Bizim kaskadyorlarımız Sain Fərmanlı və Tural Xəlili də filmdə yer alıblar. Mən Trabzon Valisi rolunda çəkilirdim.

Canlandırdığım obraz keçmiş döyüşçü, indi isə vəzifəsini itirməkdən qorxan, başının sakitliyini istəyən, suyu da üfürə-üfürə içən, hətta iki qüvvə arasında qalanda ailəsini də götürüb malikanəsindən çıxıb gedən bir insandır. Əminəm ki, serial tamaşaçıların böyük marağına səbəb olacaq".

Qeyd edək ki, serialın treyleri artıq Birinci Kanalın rəsmi saytında yerləşdirilib.