Qurban Qurbanov: ''Rəqibin kimliyindən asılı olmayaraq riskə gedəcəyik''

Tarix: 23 Fevral 2022 17:26

"Dərhal hiss olunur ki, oyuna böyük ajiotaj var".

Sonxeber.net apasport.az-a istinadən xəbər verir ki, bunu "Qarabağ"ın baş məşqçisi Qurban Qurbanov Konfrans Liqasının pley-off mərhələsində "Marsel"ə qarşı keçiriləcək cavab oyunu barədə danışarkən deyib.

50 yaşlı mütəxəssis oyunöncəsi mətbuat konfransında fikrini bu sözlərlə davam etdirib: "Qış aylarından sonra Azərbaycanda avrokubok oyunu keçirilməmişdi. Azarkeşlərimiz də çox istəklidir. Bizə güvəndiklərinə görə hər birinə təşəkkür edirəm. Rəqibin çox yaxşı baş məşqçisi və oyun üslubu var. İlk matça kimi də onları təhlil etmişdik. Düşündüyümüzün çoxunu meydanda gördük və ona qarşı düzgün oynadıq. Səfərdə "Marsel"i daha yaxından tanıdıq. Futbolçularıma da demişəm ki, burada daha yaxşı oynamalıyıq. Azarkeşlərimiz yaxşı oyunumuzla istirahət etsinlər, hər şeyi bir anlıq da olsa unutsunlar. İnşallah, bunu bacararıq. "Marsel" son çempionat görüşündə uduzub. İstər-istəməz bizi ciddiyə alacaqlar. Bu amil bizə mane ola bilər. Amma futbolçularımın ən yaxşı oyunlarını göstərəcəyinə inanıram".

- "Qarabağ"a sabah 90 dəqiqədə minimum 2 top fərqli qələbə lazımdır. Bunun üçün nə baş verməlidir?
- Son vaxtlar komanda ilə ümumi nəzəriyyəmizə fərqli yanaşırıq. Daha irəli getmək istəyiriksə, əsas yolumuz olmalıdır. Bu da daim yaradıcı və hücum futboludur. Həm "Qarabağ", həm də Azərbaycan futbolu üçün belə bir addım atmaq istəyirəm ki, futbolçularda özünəinam olsun. Xüsusən də, yerlilərdə. Hər oyuna bir yox, bir neçə qol vurmaq üçün çıxırıq. Əlbəttə, asan yol deyil. Azərbaycan futbolu üçün, bəlkə də, ən çətin yoldur. Qarşımıza belə məqsəd qoymuşuq. Rəqibin kimliyindən asılı olmayaraq riskə gedəcəyik. Kollektiv şəkildə çox güclü komanda ilə qarşılaşacağıq. Nə qədər riskli olsa da, qol vurmaqla yanaşı, buraxmamaq barədə də düşünməliyik. Azarkeşlərimizin futbola inamını qaytarmaq istəyirik. Onlar komandalarımızın uğurunu çox arzulayırlar. Bunun üçün yolumuz, xarakterimiz olmalıdır. İnanıram ki, bu xüsusiyyətləri daha da sürətləndirəcəyik. Sabah da meydana qollar vurmaq üçün çıxacağıq. Eyni zamanda qol buraxmamağı da düşünməliyik. Belə addımları daha ciddi rəqiblərə qarşı futbolçulara aşılayanda, işimiz daha da sürətlənər. Sabah qarşımızda başqa rəqib olsaydı belə, eyni fikirdə olacaqdıq. Rəqib nə qədər imkan yaradacaq, biz nə qədər təzyiq edəcəyik, bunları oyunun gedişində görəcəyik.

- Dediniz ki, Bakıdakı oyunda hücum futbolu üçün əlimizdən gələni edəcəyik. Niyə müdafiədə oturub, daha yaxşı məqamları gözləmək yox, hücum futbolu barədə düşünürsüz?
- Bayaq da dediyim kimi, bizim oyun fəlsəfəmiz yaradıcılıq və irəlidə oynamaqdır. Müdafiədə oturmaq istəmirik. Futbolçuda inam o vaxt yaranır ki, daha güclü rəqibə qarşı müdafiə olunmur, onun üzərinə gedir. Belədə özlərini daha tez inkişaf etdirirlər. Bizə qol vurmaq lazımdır. Niyə bu sualı verdiyinizi başa düşdüm. Fransadakı son oyunlarda əksər komandalar müdafiə taktikası ilə xal qazanıblar. Amma mən təkcə bu günü yox, gələcəyi də düşünürəm.

- İlk oyunda kifayət qədər şanslara baxmayaraq, qollar üçün nə çatmadı və sabah bunun əksini görə biləcəyikmi?
- Bakıdakı oyunumuzla Avropadakı matçlarımızın dinamikası arasında böyük fərq var. Bu cür komandalara qol vurmaq heç də asan deyil. Xüsusən də, müdafiəçilərinin daha tez qərar vermələri, sürətli müdaxilə etmələri oyunçularımıza mane olur. Orada görünməyən müdaxilələr var ki, oyunçularımıza mane olur. Qapıçıların da oyununu qeyd etməliyəm. Bəzən bu səviyyədə futbolçuların daha tez düşünməsi, qərar verməsi qol vurmağımıza mane olur. Qolların sayını artırmaq üçün bu tempdə daha çox oyunlar keçirməliyik. Bunu tezləşdirmək üçün fərdi çalışmalarımız olur. Ən başlıcası mövsümboyu eyni səviyyədə oyunlar keçirmək vacibdir.

Qeyd edək ki, sabah Tofiq Bəhramov adına Respublika Stadionunda keçiriləcək qarşılaşma saat 21:45-də başlayacaq.