“Xərçəng olduğumu biləndə Allaha şükür etdim, buna həkimlərim də təəccübləndilər...”

Tarix: 2 Aprel 2022 22:46

"Adətən doğum günümü qeyd etmirəm. Çünki doğum günüm əvvəl Kəlbəcərin işğal gününə təsadüf etdiyi üçün indi də bir növ adətkar olmuşam, qəribə gəlir ad günü keçirmək. Amma bu gün hiss edirəm ki, mənə nəsə sürpriz hazırlayırlar. Çünki məni evdən çıxarıblar, hərəsi bir işlə məşğul olur və hiss edirəm ki, nəsə hazırlayırlar, amma nə olduğunu bilmirəm".

Sonxeber.net moderator.az-a istinadən bildirir ki, bunu hüquqşunas, aparıcı Zülfiyyə Bayramova deyib. Z.Bayramova xərçənglə mübarizəsindən də danışıb:

"Kəlbəcər işğaldan azad ediləndən sonra ən böyük hədiyyəni oğlum etdi, ordan məni təbrik elədi. Bu mənim üçün dünyanın ən böyük hədiyyəsi idi. Amma bu il hələ bilmirəm nə baş verir".

Z.Bayramova son zamanlar keçirdiyi əməliyyatların səbəbini də izah edib:

"Xərçəngə qalib gəlmişəm, amma bu əməliyyatlarla qalan fəsadları aradan qaldırmaq istəyirik. Çünki vaxtında ximiya qəbul etmişəm və o da müəyyən orqanları zədələyib. Yəni qorxulu bir şey yoxdur".

Z.Bayramova xərçəng olduğunu ona deyəndə Allaha şükür etdiyini bildirib:

"Xərçəng olduğumu biləndə Allaha şükür etdim. Həkimlərim də, ətrafımdakı insanlar da buna təəccübləndilər. Hətta həkim səbəbini soruşanda dedim ki, hər gün yuxudan oyananda əllərimi göyə açıb Allaha dua edirəm ki, İlahi, məni balalarımla imtahana çəkmə. Allah da bu gün məni balalarımla yox, özümlə imtahana çəkdi və dualarımı eşitdi. Biz o şəhid analarının yerində olsaq, nə olardı? Onlara bu dəqiqə desən ki, sən sağalmayan xəstəliyə düçar olacaqsan, amma əvəzində balan sağalıb gələcək, onda buna razı olarlar. Bu şeyləri eşidib Allaha şükür edirəm".