Millimiz 2 qolla canını qurtardı

Tarix: 12 Aprel 2022 22:28

Qadın futbolçulardan ibarət Azərbaycan millisi növbəti oyununu keçirib.

Sonxeber.net apasport.az-a istinadən bildirir ki, yığmamız DÇ-2023-ün seçmə mərhələsində Danimarka ilə qarşılaşıb.

Avropa zonası üzrə E qrupunda mübarizə aparan Siyasət Əsgərovun yetirmələri evdə 0:8 hesabı ilə uduzduğu qrupun lideri ilə bu dəfə Viborq şəhərindəki eyniadlı stadionda üz-üzə gəlib.

İlk 7 matçında rəqiblərinin qapısından 36 top keçirən danimarkalılar bu dəfə insaflı davranıb. Ev sahibləri hər hissədə bir dəfə fərqlənərək, 2:0 hesablı qələbə qazanıb.

8-ci oyununda 7-ci dəfə məğlub olan komandamız üç xalla sonuncu pillədə qalıb.

Qeyd edək ki, qrupumuzda yer alan Rusiya yığması FIFA və UEFA tərəfindən bütün beynəlxalq yarışlardan kənarlaşdırılıb. Yığmamız son iki matçını sentyabrın 2-də Malta, 6-da Bosniya və Herseqovinaya qarşı keçirəcək.

DÇ-2023-ün seçmə mərhələsi
Avropa zonası, E qrupu
12 aprel
20:00. Danimarka - Azərbaycan - 2:0
Baş hakim: Silvia Dominqos (Portuqaliya)
Viborq. "Viborq" stadionu