Qız ərzaq çatdırılması xidməti sayəsində girovluqdan xilas oldu

Tarix: 27 Iyun 2022 13:16

ABŞ-ın Nyu-York şəhərində bir qız yemək çatdırılması xidmətinə sifariş üçün mesaj göndərib və girovluqdan qaçıb.

Sonxeber.net bildirir ki, bu barədə CBS News yazır.

İyunun 19-da səhər tezdən "Chipper Truck" kafesinə qeyri-adi mesajla sifariş gəlib. Şərhdə belə yazılıb: "Sifarişi polisə çatdırın, ancaq bunu yalnız təmkinli edin". Müəssisənin əməkdaşları sahibləri ilə əlaqə saxlayıb, mesaj barədə məlumat veriblər. Onlar müştərinin həyatını təhlükəyə atmamağı və polisə müraciət etməyi tövsiyə ediblər.

Polis hadisə yerinə gələndə qanunsuz azadlıqdan məhrumetmə və 24 yaşlı qızı zorlamaqda ittiham olunan 32 yaşlı Kemoy Royalı həbs edib. Zərərçəkmişin sözlərinə görə, Royal ona telefonundan çatdırılma sifariş etməyə icazə verib və o, bu şansdan yararlanıb.

Sonradan məlum olub ki, hadisəni törədən şəxs iyunun 14-də qonşusunu zorlamaq cəhdinə görə artıq axtarışda olub. Daha sonra onun qurbanı qaçaraq cinayət barədə polisə məlumat verə bilib.

Kafenin əməkdaşlarına biganə qalmadıqlarına görə təşəkkür edilib, yeməklərin çatdırılması xidməti isə minnətdarlıq əlaməti olaraq müəssisəyə beş min dollar ödəyəcəyini vəd edib.

İrfan Vəliyev