Avropada meşə yanğınları 3 dəfə artıb - FOTO

Tarix: 17 Iyul 2022 20:32

Avropada meşə yanğınları davam edir.

Sonxeber.net APA-ya istinadən xəbər verir ki, güclü quraqlıq səbəbindən Avropanın bir çox yerlərində meşə yanğınları öncəki illərlə müqayisədə daha tez başlayıb və bu, iqlim dəyişikliyi ilə əlaqələndirilir.

Yanvarın 1-dən iyulun 16-dək olan dövrdə Avropa İttifaqında 346 min hektar meşə yanıb və bu, son 16 ildə illik orta göstəricidən 3 dəfə çoxdur.

Güclü külək və isti səbəbindən Fransada 5 gündür Bordo regionunda yanğını söndürmək mümkün olmur, 11 min insan evakuasiya edilib.

Güclü yanğın yaşayış məntəqələrinə yaxınlaşır. Təyyarələr də cəlb olunmaqla, 3 min yanğınsöndürən meşə yanğınlarının söndürülməsinə çalışır. Yunanıstan da Fransaya yanğınsöndürmə avadanlıqları göndərib.

Portuqaliyada bir həftədir yüksək temperatur və quraqlığın səbəb olduğu yanğınlarla mübarizə aparılır. Mindən çox yanğınsöndürən evlərini yanğından qorumaq istəyən vətəndaşlarla birgə yanğınla mübarizə aparır. Portuqaliyada bu il indiyə qədər 30 min hektardan çox meşə sahəsi yanıb ki, bu da 2021-ci ildə yanğın nəticəsində məhv olan meşə yanğınlarının ümumi sahəsindən çoxdur.

İspaniyada da meşə yanğınları min hektarlarla sahəni əhatə edir. İki böyük meşə yanğını zamanı 7,4 min hektara yaxın meşə yanıb.

Malaqa əyalətində Mixas kəndi yaxınlığında başlayan yanğınla əlaqədar Əndəlüsün cənubundan 3 min nəfər evakuasiya edilib. Yanğınların söndürülməsinə 200 yanğınsöndürən və 18 təyyarə cəlb olunub.

Artıq 6 gündür ki, Las-Urdes rayonunda ildırımın səbəb olduğu yanğını söndürmək mümkün olmayıb.