Daha bir epidemiya gəlir?

Tarix: 18 Iyul 2022 15:46

Ümumdünya Səhiyyə Təşkilatı (ÜST) Qanada Marburq virusunun yayıldığını elan edib. 

Sonxeber.net bizim.media-ya istinadən xəbər verir ki, buna ölkədə ölən iki nəfərin Ebolaya bənzər yüksək yoluxucu xəstəlik olan Marburq virusu üçün verilən test nəticəsinin müsbət çıxması səbəb olub. 

Belə ki, Seneqaldakı bir laboratoriya tərəfindən təsdiqlənən nəticələrə əsasən, cənub Aşanti bölgəsindəki iki xəstənin hər ikisində ölməzdən əvvəl ishal, qızdırma, ürəkbulanma və qusma kimi simptomlar olub. 

ÜST-ün açıqlamasına görə, BMT-nin səhiyyə agentliyinin laboratoriyası Qanadakı Noquçi Memorial Tibbi Tədqiqatlar İnstitutunun nəticələrini təsdiqləyib.  

ÜST-ün Afrika üzrə Regional Direktoru Dr. Matshidiso Moeti səhiyyə orqanlarının mümkün bir epidemiyaya hazırlaşmağa tez bir zamanda reaksiya verdiklərini bildirib: 

"Bu yaxşıdır, çünki dərhal və qətiyyətli hərəkətlər olmadan Marburq asanlıqla nəzarətdən çıxa bilər. ÜST səhiyyə orqanlarını dəstəkləyir və indi epidemiya elan edildikdən sonra biz cavab tədbirləri üçün daha çox resurs yığırıq". 

ÜST bildirib ki, Ebola ilə eyni ailədən olan çox yoluxucu hemorragik qızdırma, insanlara meyvə yarasaları tərəfindən yoluxur. İnsanlar arasında yoluxmuş insanların bədən mayeləri və səthləri ilə birbaşa təmas yolu ilə yayılır. 

Məlumat üçün bildirək ki, 1967-ci ildən bəri, əsasən Afrikanın cənubunda və şərqində bir neçə dəfə böyük Marburq epidemiyası baş verib.