23 yaşlı sərxoş ''Audi'' ilə 4 qızı öldürdü

Tarix: 19 Iyul 2022 12:16

Rusiyada Başqırdıstanda ölümlə nəticələnən qəza yerindən kadrlar yayılıb.

Sonxeber.net bildirir ki, məlumat Daxili İşlər Nazirliyinin regional idarəsi tərəfindən VKontakte-dəki rəsmi qrupda dərc olunub.

Faciə iyulun 18-də səhər tezdən Bakalı kəndi yaxınlığında baş verib. "Audi A5"in sükanı arxasında 23 yaşlı sərxoş yerli sakin olub. O, avtomobili yolun zolağında ona tərəf gedən dörd qıza vurub. Təcili yardım gələnə qədər qızların hamısı ölüb.

Başqırdıstan yol polisinin rəisi Vladimir Sevastyanov bildirib ki, sürücü avtomobili saatda təxminən 110 kilometr sürətlə idarə edib. Onun verdiyi məlumata görə, ölənlərdən ikisinin 19, daha ikisinin 18 və 16 yaşı var.

Öldürülən 4 qız Bakalinski 1 saylı məktəbin məzunları olub. Ölənlərlə bağlı təfərrüatları "Odnoklassniki" səhifəsində Bakalinski rayon administrasiyasının rəhbəri Aleksandr Andreyev bildirib.

Andreyev sosial şəbəkədə yazıb: "Bütün qızlar Bakalinski Birinci Məktəbinin məzunlarıdır, çox fəal, istedadlı, məsuliyyətlidirlər, lakin təəssüf ki, onların həyatları çox erkən bitib".

O, həmçinin həlak olanların valideynlərinə və yaxınlarına başsağlığı verib.

Başqırdıstan rəhbəri Radiy Xabirov bildirib ki, xarici avtomobilin sürücüsü cəzadan yayınmamalıdır. Qızları öldürən sürücünün sükan arxasında sərxoş olması onu xüsusilə qəzəbləndirib.

Sürücünün kimliyi ilə bağlı təfərrüatlar məlum olub. Sürücü haqqında məlumatı Ufa1.ru portalı dərc edib.

Məlumata görə, avtomobilin sahibi Ufa Dövlət Neft Texniki Universitetinin 23 yaşlı tələbəsi Mars adlı yerli sakin olub. Nəşrin müəllifləri gəncin sosial media hesablarını təhlil etdikdən sonra belə qənaətə gəliblər ki, qəza iştirakçısı neft-qaz sənayesi ilə bağlı imkanlı ailədən ola bilər.

Öz növbəsində, KP-Ufa xəbər verir ki, Mars dəfələrlə xarici avtomobilində yarışların fotolarını, eləcə də xaricə səfərlərindən fotoreportajlar dərc edib. Eyni zamanda jurnalistlər qeyd edirlər ki, avtomobil bu gəncin qeydiyyatında olmasına baxmayaraq, onun idarə etdiyinə dair təkzibolunmaz sübut yoxdur.

İrfan Vəliyev