Vətən müharibəsi iştirakçısı Vüsal Tağıyev əlillik dərəcəsi ala bilmir - VİDEO

Tarix: 12 Oktyabr 2022 16:22

Vətən müharibəsi qazisi iki ildir ki, əlillik dərəcəsi ala bilmir.

Sonxeber.net Xəzər Xəbər-ə istinadən xəbər verir ki, bu müddət ərzində Azərbaycan Silahlı Qüvvələrinin Baş Klinik Hospitalı və bir neçə özəl xəstəxanada müalicə alan müddətdən artıq həqiqi hərbi xidmət qulluqçusu Vüsal  Tağıyev Kəlbəcər uğrunda gedən döyüşlərdə düşmənin artilleriya atəşi nəticəsində ağır xəsarətlər alıb.

Tovuz rayonunun Aşağı Öysüzlü kənd sakini olan qazi əlillik dərəcəsinin təyinatını və bu təyinat üzrə müavinətini ala bilmədiyini iddia edir.

Qazi lazımi sənədləri onlayn qaydada Dövlət Sosial Müdafiə Fondunun müvafiq bazasına yükləyib. Amma Vüsal Tağıyevə imtina gəlib.

Dövlət Sosial Müdafiə Fondundan "Xəzər Xəbər"ə bildirilib ki, Vüsal Tağıyevin əlillik vəziyyətinin qiymətləndirilməsi məqsədilə yaşadığı yerin tibb müəssisəsi tərəfindən əlillik altsisteminə daxil edilən "Forma 88" sənədində əlillik təyinatına əsas verən xəstəliyin səbəb əlaqəsi düzgün göstərilməyib. Bu səbəbdən də təyinat aparmaq mümkün olmayıb. Hazırda Dövlət Tibbi-Sosial Ekspertiza və Reabilitasiya Agentliyi olaraq, xəstəxana ilə əlaqə saxlanılıb, səbəb əlaqəsinin düzəldilməsi və yenidən göndərilməsi istənilib. Yaxın zamanda vətəndaşla bağlı qərar veriləcək.

Qeyd edək ki, hazırda qazimiz müharibə iştirakçısı olaraq 80 manat müavinət alır.

Xezerxeber.az mövzu ilə bağlı daha ətraflı videomaterialı təqdim edir: