Azərbaycanda İT xərclərin azaldılması informasiya təhlükəsizliyinə risk yarada bilər

Tarix: 8 Fevral 2023 08:26

"İT xərclərin optimallaşdırılmasının bu xərclərin azaldılması kimi anlaşılması İT sektorun inkişafına, həm də informasiya təhlükəsizliyinə ciddi rikslər yaradır".

Sonxeber.net "report"a istinadən bildirir ki, bunu İqtisadiyyat Nazirliyinin Elektron İdarəetmə şöbəsinin müdiri Anar Nərimanov Xüsusi Rabitə və İnformasiya Təhlükəsizliyi Dövlət Xidmətinin (XRİTDX) təşkilatçılığı ilə keçirilən "Dövlət Qurumlarının İT rəhbərlərinin I Zirvə Toplantısı"nda çıxışı zamanı deyib.

A.Nərimanov hesab edir ki, hər dövrün öz tələbləri var və bu tələbə uyğun davranmaq lazımdır:

"Hər bir dövrün, hər bir zamanın tələbinə görə İT xərcləri dəyişir. Təxminən 10 il öncə "Desktop həllər" dövründə xərclər, tətbiq olunan texnologiyalar, avadanlıqlar və onların üzərində gələn lisenziyalar tamam başqa idi. O dövrə görə xərclər formalaşırdı. Hazırki dövrə görə, SMART və "Web həllər" var. Həmçinin çoxlu informasiya təhlükəsizliyi ilə bağlı kənar həllər var. Ona görə də biz İT xərclərinin optimallaşdırılması anlayışını İT xərclərinin azaldılması anlayışı ilə qarışdırsaq bu bizim üçün ciddi risklər yarada bilər. Bu risklər həm İT-nin inkişafına, həm də informasiya təhlükəsizliyinə tətbiq edilən həllərə təsir edər. İT xərclər optimallaşdırılmalıdır, amma inkişaf yönümlü!".

O qeyd edib ki, özəl sektorda İKT sahəsində qazanılan təcrübə dövlət sektorunda da tətbiq edilir:

"Mən də daxil olmaqla burada əyləşən bir çoxları dövlət sektoruna məhz özəl sektordan gəlmişik. Məhz özəl sektorda qazandığımız texnoloji bilikləri dövlət sektorunda tətbiq etməyə başlamışıq. Özəl sektorun əlaqələri və imkanları daha genişdir. Biz burada dövlət qurumları arasındakı əlaqələri müzakirə edirik. Amma nəzərə almalıyıq ki, hazırda bir çox dövlət qurumlarında özəl sektor həm texniki dəstək, həm şəbəkə həlləri, həm də proqram təminatı ilə bağlı həllər təqdim edirlər. Bəzən dövlət qurumlarının informasiya axınının bir çox hissəsi özəl sektordadır. Əslində bu da normaldır. Əslində dövlət qurumuna xidmət edən özəl sektor da olmalıdır".