Yüksək vəzifə verilən Mehriban Ələkbərzadədən ilk açıqlama - YENİLƏNİB

Tarix: 13 May 2023 16:51

16:46

Musavat.com Mehriban Ələkbərzadənin yeni təyinatla bağlı təəssüratlarını öyrənib.

Əməkdar incəsənət xadimi bildirdi ki, Akademik Milli Dram Teatrında 27 illik təcrübəyə malikdir:

"Mən ilk addımlarımı o teatrda atmışam. Ona görə belə də olmalı idi. Təbii ki, yeniliklər olacaq. Mən hər dəfə fəaliyyətimin yeni, böyük mərhələsini yeni bir teatrda edirəm".  

-------

16:06

Əməkdar incəsənət xadimi, rejissor Mehriban Ələkbərzadə Akademik Milli Dram Teatrının bədii rəhbəri təyin edilib.

Bununla bağlı mədəniyyət naziri müvafiq əmr imzalayıb.

Qeyd edək ki, Akademik Milli Dram Teatrının rəhbərliyinə gətirilən Mehriban Ələkbərzadə 1965-ci il avqust ayının 5-də Gəncə şəhərində doğulub. Uşaq yaşlarından ailəsi Sumqayıt şəhərinə köçüb və 17 saylı orta məktəbi bitirib.

Bir il Sumqayıt Dövlət Dram Teatrında rejissor köməkçisi işləyib. 1983-cü ildə Mirzağa Əliyev adına Azərbaycan Dövlət İncəsənət İnstitutunun rejissorluq fakültəsinə daxil olub və 1988-ci ildə oranı bitirib. Təyinatla Lənkəran Dövlət Dram Teatrına göndərilib.

İxtisas təhsilini görkəmli rejissor Mehdi Məmmədovun kursunda alan Mehriban Ələkbərzadə hələ tələbəlik illərində institutun Tədris teatrında Tennessi Uilyamsın "Sökülən yurd", Eduard de Filipponun "Silindr", Dövlət televiziyasında Elçinin "Ömrün son səhəri" pyeslərini tamaşaya hazırlayıb. Elçinin bu əsəri televiziya tamaşası kimi də çəkilib.

1990-cı ildə Lənkərandan Bakıya qayıdandan sonra "Azərbaycanfilm" kinostudiyasında "Güzgü" qısametrajlı bədii filmini çəkib.

1991-ci il yanvar ayının 28-də Akademik Milli Dram Teatrına rejissor köməkçisi ştatına işə götürülüb. 1 aprel 1994-cü ildən isə həmin teatrda quruluşçu rejissor işləyib.

O, "Azdrama"da "Dəfn edilməmiş ölülər", "Min illərin işığı", "Müəmmalı bir qətlin üç versiyası", "Poçt şöbəsində xəyal", "Afət" və başqa tamaşalar hazırlayıb.

2003-cü ildə Naxçıvan MR-in "Əməkdar incəsənət xadimi" fəxri adına layiq görülüb.

25 iyun 2013-cü ildə Azərbaycan Respublikasının "Əməkdar incəsənət xadimi" fəxri adına layiq görülüb.

AMEA-nın "Yeni tarix" şöbəsinin elmi işçisidir. 2017-22-ci illərdə Azərbaycan Dövlət "Yuğ" teatrının baş rejissor kimi fəaliyyət göstərib.

2022-ci ildən 2023-cü ilin may ayına kimi Azərbaycan Dövlət Gənc Tamaşaçılar Teatrının baş rejissoru vəzifəsində çalışıb.

O, müxtəlif Prezident mükafatlarına layiq görülüb.

Milli.Az