''Üz-gözlərini pis günə qoyanları, bir sözlə yüngüllük edənləri həmkarım adlandıra bilmərəm'' - İlahə Fəda

Tarix: 18 May 2023 11:55

Sonxeber.net xəbər verir ki, tanınmış və sevilən müğənni İlahə Fəda Moderator.az-ın suallarını cavablandırıb.

-İlahə xanım, nədənsə bu günki efirlərdə sizi nadir hallarda görürük. Dəvət etmirlər yoxsa siz seçim edirsiniz?

-Xeyr, dəvət edirlər. Sağ olsunlar, heç bir telekanal ilə problemim yoxdur. Nəinki telekanal ilə, heç aparıcılar, rejissorlar, prodüsserlərlə də indiyə qədər heç bir problem yaşamamışam. Dəvətlər olsa da, bəzən seçim etməli oluram. Ona görə də məni az-az görürsünüz. Bir də, çox tez-tez görünmək istəmirəm. Bunun mənasız olduğunu düşünürəm. Az amma yaxşı, səviyyəli, sanballı işlərlə ortalığa çıxmaq lazımdır.

-Sənət həyatı ilə yaşamaq necə bir hissdir?

-Bu çox gözəl bir hissdir. Çünki şəxsən mən özümü seçilmişlərdən hesab edirəm. Allah təala mənə belə bir səs, istedad verib. Düzdür, hər kəsin bir istedadı var, amma mən belə düşünürəm ki, insanın səsinin olması tamam başqa bir istedaddır. Sənət həyatı yaşadığım üçün özümü xoşbəxt hiss edirəm. 2-ci dəfə dünyaya gəlsəydim yenə də sənətlə məşğul olardım. Amma əsl sənət həyatı. Sənət həyatı adı altında başqa, sənətdən uzaq, sənətə yad işlərlə məşğul olmaq, sənətin adına xələl gətirmək, məşhurluq naminə sənətdən istifadə etmək, sənəti alçaltmaq və s. bu işlərlə məşğul olmamaq şərtilə sənət həyatı yaşamaq çox gözəldir. Ümumiyyətlə sənət mənim üçün müqəddəsdir. Müqəddəs olan heç nəyə xəyanət etmək olmaz. Həmçinin də sənətə xəyanət etmək olmaz. Sənətə xəyanət etməyəndə sənət səni devləşdirir, yüksəldir, hörmətli, sanballı edir. Mən də məhz bu cür sənət həyatı yaşayıram və bunun üçün də çox xoşbəxtəm. 

-Sizcə sənəti düzgün təbliğ etməyən müğənniləri efirlərə buraxmaq lazımdırmı?

-Bunun qərarını mən verə bilmərəm. Hətta mənim elə imkanlarım olsaydı da mən bu barədə qərar verə bilməzdim. Buna efirlər, oradakı redaktorlar qərar verməlidir. Məncə sənəti olmayanları efirə buraxmasalar, onlar bir az da çoxalacaq, bir az da hirslənib, sənətə xəyanət edəcəklər. Qoy elə oxusunlar. Camaat da sənətlə, sənətkarla, sənəti olmayanı görüb, müqayisə etsin. Cammaat elə bilir ki, efirlərdə tez-tez görünənlərin sənəti yaxşıdır deyə onları efirə çağırıblar. Bu fikirlər də yəqin ki, zövqsüzlükdən yaranır. Bir onu bilirəm ki, zaman hər şeyi həll edir, hamısını ələyir. 

-Hansı müğənnilər üçün "o mənim həmkarımdır" sözünü işlədə bilməzsiniz?

-Sənətdən sui-istifadə edənləri, səsi, ürəyi, zövqü olmayanları, ara mahnılarını təbliğ edənləri, sonra müxtəlif əməliyyatlarla bədənlərini, üz-gözlərini pis günə qoyanları, bir sözlə yüngüllük edənləri həmkarım adlandıra bilmərəm.

-Qadın sizcə neçə dəfə sevir?

-Qadın daim sevir. İlk məhəbbət isə bir dəfə olur. Sonra da ola bilər, amma əlbəttə ki, birinci sevginin yerini verə bilməz. Mən belə düşünürəm. Bəlkə elə adam var ki, ikinci dəfə daha çox sevir?!

-Şəxsi həyatınızda nəsə dəyişiklik varmı?

-Şəxsi həyatımda çox şükür ki, dəyişiklik yoxdur. Həyatım çox gözəl, ürəyimcə keçir. Nə dəyişiklik olsun ki? Niyə olsun ki?! Əzizlərim, dostlarım sağ-salamatdır. 5 günlük dünyadır. Gərək canımız sağ olsun, belə davam etsin hər şey. 

-Özünüzü xoşbəxt qadın sayırsınız?

-Əlbəttə! Çox xoşbəxt hiss edirəm özümü. İstedadlıyam və tərəzi bürcüyəm, ədalətliyəm. Sağlamam, gözələm, xoşbəxtlik üçün daha nə lazımdır? Məndə bunların hamısı var.

-Həyatınızda nə çatmır?

-Hər şey qaydasındadır. Bu həyat mənimdir. Mən necə bacarmışamsa, elə də yaşamışam, yaşayıram da. Düzdür, insanın arzuları çoxdur. Bəzən çatışmayan şeylər olur, onlar da düzəlir. Ölümdən başqa bu dünyada hər şeyin çarəsi var. Hər şeyi olduğu kimi qəbul edib yaşayanda insan rahat və xoşbəxt olur. Mən o qəbildən olan insanlardanam.