Azərbaycanı sona qədər dəstəkləyirik - TBMM sədri

Tarix: 28 Sentyabr 2023 18:28

Azərbaycanın öz torpaqlarını azad etmək həssaslığını başa düşürük, yüksək qiymətləndirir və tam dəstəkləyirik.

Sonxeber.net-ın TurkicWorld-a istinadən məlumatına görə, bu sözləri Türkiyə Böyük Millət Məclisinin sədri Numan Kurtulmuş Avropa Parlamenti Prezidentlərinin Konfransında iştirakı zamanı deyib.

TBMM sədri konfransda, "Kiprdə işğalçı Türkiyə, Qarabağda isə işğalçı Azərbaycandır" deyən yunan nümayəndəsinə sərt reaksiya verib.

"Kiprdəki işğalçı Türkiyə deyil, 1960-cı ildə qurulan qanuni Kipr Respublikasını ləğv edən, Cümhuriyyəti işğal edən yunanlardır. Ermənistanın 33 illik Qarabağ işğalı qarşısında Azərbaycanın öz torpaqlarını xilas etmək həssaslığını başa düşürük, yüksək qiymətləndirir və tam dəstəkləyirik. Qarabağ 44 gün davam edən müharibə ilə azad edilib. Qarabağ qiyamətə qədər Azərbaycan torpağı olacaq və Azərbaycan xalqına məxsus olacaq. Azərbaycan xalqı "işğalçı" deyil, "öz torpaqlarını xilas edən xalq"dır",- deyə TBMM sədri bildirib.

Kurtulmuş vurğulayıb ki, Azərbaycan və Ermənistan arasında sülhün yaradılması bütün region xalqlarının marağındadır. Zəngəzur dəhlizinin açılması isə bütün bölgə əhalisinin xeyrinədir.