''Pulun qalmadısa, uşağını qurban verməlisən'' - FOTO

Tarix: 15 Noyabr 2023 22:20

Fransada bəzi idmançıların falçıların təsiri altına düşdüyü iddia edilir.

Sonxeber.net publika.az-a istinadən xəbər verir ki, xüsusilə afrikalı futbolçuların ekstrasenslərin tapşırığıyla meydana xüsusi kəmərlər taxaraq, ətirlənərək çıxdıqları bildirilir. Kilian Mbappenin də falçıların qurbanına çevrildiyi ilə bağlı informasiyalar var.

Fransanın AFP agentliyi ölkədə yaşayan bəzi idmançıların falçılara və təbabətçilərə necə pul xərclədikləri barədə reportaj hazırlayıb. Sabiq futbolçu Yapi Yapo onların əlindən necə qurtulduğundan danışıb.

Liqa1-də "Nant"da oynayarkən çətin günlər keçirdiyini və əmisinin məsləhəti ilə falçı yanına getdiyini deyən fil dişi sahilli futbolçu ailəsi tərəfindən cadu olunduğu barədə cavab alıb. Lənəti aradan qaldırmaq üçün bəzi prosedurlardan keçməli olduğu deyilən Yapo, falçılara əvvəl kiçik, sonra isə artan məbləğdə pul ödədiyini bildirib.

Ekstrasenslərin tələb etdiyi yüksək məbləğlərdən şikayətlənən Yapo, "pulun qalmadısa, uşağını qurban verməlisən" cavabını aldıqdan sonra bu yoldan çəkilməli olduğunu anlayıb. O, falçıya ümumilikdə 200 min avro ödədiyini deyir.

Parisətrafı qəsəbələrdə yaşayan Şeyx İsa ləqəbli falçı deyir ki, bir çox peşəkar futbolçu ona bəd nəzərdən qorunmaq, uğur qismət olması və ulduzunun parlaması kimi xahişlərlə müraciət edirlər. Onun yanına təkcə idmançıların deyil, siyasətçilərin, iş adamlarının da gəldiyini bildirən Şeyx İsa həm keçmişi, həm də gələcəyi bildiyini iddia edir.

Fransa millisinin futbolçusu Pol Poqba da milli komanda yoldaşı Kilian Mbappeni cadu etməkdə günahlandırılıb və bu səbəbdən polisə ifadə verib. 2020-ci ildə Fransada keçirilən sorğuda ölkədə hər 10 nəfərdən 3-nün cadu və bənzər fövqəltəbii güclərə inanmağa meylli olduğunu ortaya çıxıb.