"Rəqibin təzyiqinə dözə bilmədik" - Ayxan Abbasov

Tarix: 20 Dekabr 2023 22:28

"Bu mərhələ bir oyundan ibarət idi. Bəlkə də bu mərhələdə ən ağır cütlük biz idik. Digər komandalar birinci liqa komandaları ilə oynayırdı. Püşk belə oldu. Bu mövsüm bizim üçün kubok bitdi".

Milli.Az qol.az-a istinadən xəbər verir ki, bu sözləri "Turan Tovuz"un baş məşqçisi Ayxan Abbasov Azərbaycan kubokunun 1/8 finalında "Zirə"yə 1:2 hesabı ilə uduzduqları oyundan sonra keçirilən mətbuat kofransında deyib.

O, 3 gün öncə Premyer Liqada "Zirə" ilə oynadıqlarını xatırladıb:  "Bilirdik ki, məğlubiyətdən sonra daha da aqressiv olacaqlar. Futbolçularımızı hazır etməyə çalışdıq. İlk dəqiqələrdəki qol rəqibi bir qədər də aqressivləşdirdi. İkinci qolu vura bilərdik. Belə oyunlarda ikinci qol lazımdır. Təəssüf ki, yorğunçuluq öz sözünü dedi. Rəqibin təzyiqinə dözə bilmədik". 

Mütəxəssis bildirib ki, sıx qrafik onlar üçün daha çox çətindir: "Digər komandalar 4 gündən bir oynayır. Biz Tovuza qayıdıb 3 gün sonra ağır oyuna çıxacağıq. Təəssüf edirəm. Rəqib ikinci hissə bizə imkan vermədi. Futbolçularımızın nə qədər soyuqqanlı olmasına çalışdıq. Oyunun təzyiqi buna imkan vermədi. Rəqibi təbrik edirəm. Növbəti oyunda qələbə qazanıb, ili qələbə ilə başa vurmağa çalışacağıq".

Milli.Az