Yekaterinburqda həbs olunan azərbaycanlıların sayı 8-ə çatıb

Tarix: 2 Iyul 2025 21:42

21:40

Yekaterinburqun Leninski Rayon məhkəməsi iyunun 27-də Rusiya hüquq mühafizə orqanlarının xüsusi amansızlıqla keçirdiyi əməliyyat nəticəsində saxlanılan Əzizov Abbas Azay oğlu barəsində qərar çıxarıb.

APA-nın Rusiya bürosu xəbər verir ki, məhkəmə Əzizov Abbas barəsində ittiham tərəfinin şikayəti əsasında iyulun 19-dək həbs qətimkan tədbiri seçib.

Beləliklə, Yekaterinburqda həbs olunan azərbaycanlıların sayı 8-ə çatıb.

Qeyd edək ki, Rusiya hüquq mühafizə orqanlarının iyunun 27-də keçirdiyi əməliyyat zamanı saxlanılan Əziz Abbasova da işgəncə verilib.

O, aldığı xəsarətlərdən daha sonra xəstəxanaya yerləşdirilib.

------------
20:05

Yekaterinburqun Leninski Rayon məhkəməsi iyunun 27-də Rusiya hüquq-mühafizə orqanlarının xüsusi amansızlıqla keçirdiyi əməliyyat nəticəsində saxlanılan Kamal Səfərov barəsində qərar çıxarıb.

Sonxeber.net xəbər verir ki, məhkəmə K.Səfərov barəsində ittiham tərəfinin şikayəti əsasında iyulun 19-dək həbs qətimkan tədbiri seçib.

Səfərova qarşı Rusiya Federasiyası Cinayət Məcəlləsinin 105.2-ci maddəsi ilə ittiham irəli sürülüb.

Beləliklə, Yekaterinburqda həbs olunan azərbaycanlıların sayı yeddiyə çatıb.

Qeyd edək ki, iyunun 27-də Rusiya Federal Təhlükəsizlik Xidmətinin digər hüquq mühafizə orqanları ilə birlikdə Yekaterinburqda azərbaycanlıların müxtəlif ünvanlardakı mənzillərinə basqın edib. Zorla mənzillərə daxil olaraq Səfərov qardaşları və digərlərinə zorakılıq və işgəncə tətbiq olunub. Daha sonra azərbaycanlılar idarəyə aparılaraq orada da işgəncəyə məruz qalıblar. Nəticədə Azərbaycan Respublikası vətəndaşı Hüseyn Səfərov və onun RF vətəndaşı olan qardaşı Ziyəddin Səfərov ağır işgəncələr nəticəsində həlak olublar. Onların əmisi oğlu Kamal Qədimalı oğlu Səfərov isə işgəncə vaxtı halı pisləşdiyindən xəstəxanaya yerləşdirilib və orada ürəyindən əməliyyat olunub.

Saxlanılan digər azərbaycanlılar Məzahir, Akif və Ayaz Səfərov qardaşları, onların əmisi oğlu Bakir Həsənov, Əhliman Gənciyev və Şahid Lalayev barəsində məhkəmə iyulun 19-dək həbs qətimkan tədbiri seçib.

Xatırladaq ki, bu gün Rusiya İstintaq Komitəsi Yekaterinburqda həbs olunan azərbaycanlıların hansı cinayətlərdə ittiham olunduğunu açıqlayıb. Qurumun sözçüsü Svetlana Petrenko Səfərov qardaşları və digər həmyerlilərimizin 2001, 2010 və 2011-ci illərdə müvafiq olaraq Yunis Paşayevin qətlində, F.Şirinovu öldürməyə cəhddə və İkram Hacıyevin qətlini sifariş verməkdə ittiham olunduqlarını bəyan edib. /APA