AQTA uşaqların sağlam qidalanma vərdişləri mövzusunda yeni videoçarx hazırlayıb (VİDEO)

Tarix: 17 Dekabr 2019 11:00

Bakı. Trend:

Azərbaycan Qida Təhlükəsizliyi Agentliyi (AQTA) son günlərin ən aktual mövzusu olan sağlam qidalanma vərdişlərinə həsr olunan maarifləndirici videoçarx hazırlayıb.

AQTA-dan Trend-ə verilən məlumata görə, yeni videoçarxda valideynlər tərəfindən uşaqlara erkən yaşlarından sağlam qidalanma vərdişlərinin aşılanması tövsiyə olunur.

Maarifləndirici videoçarxda bəzi hazır qidaların uşaqlar üçün daha cəlbedici olmasına baxmayaraq, onların bununla bağlı öz valideynləri tərəfindən vaxtında məlumatlandırılması və düzgün istiqamətləndirilməsinin vacibliyi diqqətə çatdırılır.

Onu da qeyd edək ki, AQTA fəaliyyətə başladığı ilk gündən etibarən məktəb yaşlı uşaqların qida təhlükəsizliyi ilə bağlı maarifləndirilməsinə xüsusi diqqət yetirir və mütəmadi olaraq uşaqlar üçün maraqlı layihələr təşkil edir. Xüsusi ilə Agentliyin “Sağlam məktəbli” layihəsi çərçivəsində keçirilən tədbirlərə bu günə qədər 20 minə yaxın məktəbli cəlb olunub, onlara sağlam qida vərdişləri aşılanıb.

Sağlam qidalanma vərdişlərinə həsr olunan yeni videoçarx da bu sahədə aparılan təbliğat və təşviqat işlərinin növbəti mərhələsini təşkil edir.

Trend-in ən mühüm və maraqlı xəbərlərini "Telegram"da izləyin