Dövlət Komitəsi diaspor quruculuğu istiqamətində daha bir yeniliyə imza atıb (FOTO)

Tarix: 29 Dekabr 2019 12:33

Bakı. Trend:

Diasporla İş üzrə Dövlət Komitəsinin təşkilatçılığı və dəstəyi ilə 16-21 dekabr 2019-cu il tarixlərində “Liderliyin İnkişafı Proqramı” layihəsi çərçivəsində Almaniya, Fransa, Türkiyə, Ukrayna və Gürcüstandakı Azərbaycan icmalarını təmsil edən nümayəndələr ölkəmizə səfər ediblər. Səfər proqramına ümummilli liderin məzarını və Şəhidlər Xiyabanını ziyarətlə başlayan nümayəndə heyəti Heydər Əliyev Mərkəzində olub, habelə ölkənin bir sıra yüksək səviyyəli dövlət və hökumət rəsmiləri ilə görüşüb.

Diasporla İş üzrə Dövlət Komitəsindən Trend-ə verilən məlumata görə, Azərbaycan icmasının nümayəndələri Komitənin sədri Fuad Muradov, Gənclər və İdman naziri Azad Rəhimov, Mədəniyyət naziri Əbülfəs Qarayev, Milli Məclisin Hüquq siyasəti və dövlət quruculuğu komitəsinin sədri Əli Hüseynli, Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev, Dövlət Miqrasiya Xidmətinin rəisi Vüsal Hüseynov, Prezidentin köməkçisi-Prezident Administrasiyasının Xarici siyasət məsələləri şöbəsinin müdiri Hikmət Hacıyev, Prezident Administrasiyasının Humanitar siyasət, diaspor, multikulturalizm və dini məsələlər şöbəsinin müdiri Fərəh Əliyeva, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, Dövlət Turizm Agentliyinin sədri Fuad Nağıyev, Xarici İşlər nazirinin müavini Ramiz Həsənov, Təhsil nazirinin müavini Firudin Qurbanov, Kiçik və Orta Biznesin İnkişafı Agentliyinin sədri Orxan Məmmədov, Beynəlxalq Münasibətlərin Təhlili Mərkəzinini İdarə Heyətinin sədri Fərid Şəfiyev və “ADA” Universitetinin prorektoru Fariz İsmayılzadə ilə görüşlər keçiriblər.

Görüşlər zamanı xaricdəki soydaşlarımızın öz tarixi vətənləri ilə əlaqələrinin genişləndirilməsi, Azərbaycan əsilli idmançıların Azərbaycan idmanına töhfə verməsi imkanları, Azərbaycan mədəniyyətinin xaricdə təbliği, “Soydaşlar haqqında” Qanun layihəsinin perspektivləri və dünyadakı soydaşlarımızın hüquqlarının daha effektiv qorunması, azərbaycanlı məcburi köçkünlərin vəziyyətinin yaxşılaşdırılması yolları, soydaşlarımızın üzləşdiyi miqrasiya problemləri, azərbaycanlı icmalarının yaşadıqları ölkələrin cəmiyyətlərinə daha sürətli inteqrasiyası və bu ölkələrin Azərbaycan ilə əlaqələrinin qurulmasına dəstəyi, ölkəmizdə turizmin, eləcə də kiçik və orta biznezin inkişafı imkanlarının təşviqi, xaricdəki soydaşlarımızın milli təhsil problemləri, Azərbaycan həqiqətlərinin beynəlxalq miqyasda olduğu kimi qəbul etdirilməsi istiqamətində mümkün səmərəli fəaliyyət imkanları barədə fikir mübadiləsi aparılıb və təkliflər dinlənilib.

Səfər çərçivəsində soydaşlarımız Masazır qəsəbəsindəki məcburi köçkün ailələri, Xocalı şəhidi və Aprel şəhidi ailələrinə baş çəkib. Həmçinin Cocuq-Mərcanlı kəndinə səfər edən qonaqlar erməni işğalından azad edildikdən sonra burada aparılmış geniş miqyaslı quruculuq işləri, yaradılmış müasir infrastruktur və yaşayış şəraiti ilə tanış olub, Aprel şəhidlərinin xatirə abidəsi, kənd orta məktəbi və kənd məscidini ziyarət edib. Eyni zamanda, icma nümayəndələri Cəbrayıl rayon İcra Hakimiyyətinin başçısı Kamal Həsənovla görüşüblər. Sonda “Liderliyin İnkişafı Proqramı”nın ilk məzunlarına rəmzi məkan kimi seçilmiş Cocuq-Mərcanlıda müvafiq sertifikatlar təqdim olunub.

Qeyd edək ki, “Liderliyin İnkişafı Proqramı”nın məqsədi xaricdəki soydaşlarımız arasında milli kimliyin qorunub-saxlanılması və təşviqinə dəstək verilməsi, Azərbaycan reallıqlarının dünyaya yayılması, icmalarımızın, Azərbaycana dost olan digər xalqların diaspor təşkilatlarının və eləcə də onların yaşadıqları ölkələrin Azərbaycan Respublikası ilə ikitərəfli əlaqələrinin inkişaf etdirilməsi, qarşılıqlı faydalı əməkdaşlığın qurulması işinə tövhə verilməsi və bu məqsədlə icma üzvlərində liderlik keyfiyyətlərinin təşviq olunmasıdır.

Trend-in ən mühüm və maraqlı xəbərlərini "Telegram"da izləyin

Ən ucuz aviabiletlər!