Milli Gimnastika Arenasında idman gimnastikası üzrə FIG Dünya kubokunun iştirakçılarının podium məşqləri keçirilir (FOTOREPORTAJ)

Tarix: 11 Mart 2020 15:48

Bakı. Cani Babayeva - Trend:

Bakıda Milli Gimnastika Arenasında idman gimnastikası üzrə FIG Dünya kubokunun iştirakçılarının podium məşqləri keçirilir.

Trend-in məlumatına görə, 2020-ci il Yay Olimpiya Oyunlarına lisenziya xarakteri daşıyan yarış martın 12-dən 15-dək keçiriləcək.

Dünya kubokunun iştirakçısı, britaniyalı gimnast Heyden Skinner bildirib ki, məşq yaxşı keçib və o yarışlarda yaxşı nəticə göstərəcəyinə ümid edir:

“Bu, mənim Bakıya ilk səfərimdir. Burada hər şey, xüsusilə də insanlar mənim xoşuma gəlir. Dünya Kubokunda mənim əsas məqsədim yaxşı nəticə göstərmək, proqramımı səhvsiz yerinə yetirməkdir”.

Qazaxıstan gimnastı Nəriman Qurbanov Bakıya üçüncü dəfə gəldiyini deyib:

“Yarışlara hazırlıq əla keçir, bizim üçün gözəl şərait yaradılıb. Bakıda əvvəlki çıxışlarımı xatırlasaq, 2018-ci ildə 7-ci, 2019-cü ildə isə 4-cü olmuşam. Bu il ilk üçlükdə yer almağa ümid edirəm”.

Qvatemalanı təmsil edən Xorxe Veqa Lopes vurğulayıb ki, Dünya kubokunda kifayət qədər yüksək rəqabət var:

“Buna baxmayaraq, ümid edirəm ki, yaxşı nəticə göstərəcəm və medallar uğrunda mübarizə aparacam. Yarışın təşkilatçılığı yüksək səviyyədədir, iştirakçılar arasında olmaqdan məmnunam”.

Trend məşqdən fotoreportajı təqdim edir: