''Mövcud qaydalara riayət olunması və zəruri profilaktik tədbirlərin davam etdirilməsi vacibdir''

Tarix: 1 May 2020 12:30

Azərbaycanda daxil olmaqda, dövlətlərin karantin rejiminin yumşaltması və mərhələli olaraq əvvəlki həyat tərzinə dönmək istəyi heç də, pandemiyaya son qoyulduğu demək deyil. Hamımız bilməliyik ki, bu virus insan sağlamlığı üçün çox təhlükəlidir. Məsələn, Cənubi Koreyada virusdan sağalan bir neçə xəstə yenidən koronavirus simptomları ilə xəstəxanaya müraciət edib.

Bu fikirləri Sonxeber.net-a açıqlamasında Milli Məclisin deputatı Jalə Əhmədova bildirib.

O qeyd edib ki, ekspertlərin və ÜST-ün proqnozlarına görə yay ayları ərzində virusun ikinci dalğa olaraq daha da aqressiv formada dönmə riski var. "Əhali bilməlidir ki, COVID-19 xəstəliyi uzunmüddətli prosesdir. Bu səbəbdən mövcud qaydalara riayət olunması və zəruri profilaktik tədbirlərin davam etdirilməsi vacibdir. Ona görə də, mütləqdir ki, xüsusi karantin rejiminin qaydalarına əvvəlki qaydada riayət edək. Nəzərə almaq lazımdır ki, aprel ayının 26-da 28 nəfər virusa yoluxmuşdusa, 29-da bu rəqəm 49 olub. Bu yoluxma sayının artması ondan xəbər verir ki, insanlarımız karantin qaydalarına riayət etmirlər", - Milli Məclisin deputatı vurğulayıb.

Onun sözlərinə görə, məhdudiyyətlərin bir qismi aradan qaldırılsa da, virusa yoluxma sürətinin qarşısını almaq üçün ölkədə kütləvi tədbirlər keçirilməməlidir, vətəndaşlar əvvəlki dövrdə olduğu kimi 2 metrlik sosial məsafə tələbinə riayət etməlidirlər. Yaşı 65-dən yuxarı olan vətəndaşlar evdən çıxmamalıdırlar.

Jalə Əhmədova qeyd edib ki, dövlətimizin başçısının qətiyyətli qərarları və iradəsi sayəsində pandemiyanın birinci dalğasını az itki ilə başa vurduq. Yəni, dövlət üzərinə düşəni edir. Biz yalnız karantin qaydalarına maksimum şəkildə riayət etməklə pandemiyanın ikinci dalğasının başlamasının qarşısını ala bilərik. "Biz birlikdə güclüyük. Əminəm ki, insanlarımız karantin qaydalarına ciddi riayət edəcək və biz xəstəliyin yenidən yayılmasının qarşısını alacağıq", - deputat vurğulayıb.