Azərbaycan XİN ölkəmizin Polşadakı səfiri Həsən Həsənovla görüş keçirib - FOTO

Tarix: 10 May 2020 22:48

Azərbaycanda elan olunmuş "Könüllülər ili" çərçivəsində Azərbaycan Respublikası Xarici İşlər Nazirliyi tərəfindən bu qurumun nəzdində fəaliyyət göstərən "Diplomatiya Könüllüləri" üçün Azərbaycan xalqının Ümumilli lideri Heydər Əliyevin anadan olmasının 97-ci ildönümü münasibətilə Azərbaycan Respublikasının Polşa Respublikasındakı Fövqəladə və Səlahiyyətli səfiri Həsən Həsənov ilə görüş təşkil olunub.

Xarici İşlər Nazirliyindən Sonxeber.net-a verilən məlumata görə, görüş zamanı səfir Həsən Həsənov Ulu Öndərin müdrik daxili və xarici siyasəti haqqında geniş bəhs etdi, Ulu Öndər haqqında xatirələrini bölüşdü.

Səfir Azərbaycan xalqının Ümummilli lideri Heydər Əliyevin təkcə Azərbaycan üçün deyil, bütün dünya üçün fenomenal bir şəxsiyyət olduğunu xüsusi olaraq vurğuladı.

Görüşdə, əsası Ulu Öndər tərəfindən qoyulmuş və hazırda ölkə rəhbərliyi tərəfindən davam etdirilən gənclər siyasətinin əhəmiyyəti və bu xüsusda, könüllülük hərəkatının önəmi vurğulandı və 2020-ci ilin məhz "Könüllülər ili" elan olunmasının Azərbaycan Respublikasının Prezidentinin könüllülərə verdiyi dəyərinin növbəti nümunəsi olduğu qeyd edildi.

Sonda Azərbaycan dövləti tərəfindən Azərbaycan gəncləri üçün yaradılan bütün imkanlara görə ölkə rəhbərliyi- Azərbaycan Respublikasının Prezidenti cənab İlham Əliyevə və I Vitse-Prezidenti xanım Mehriban Əliyevaya Diplomatiya Könüllüləri adından xüsusi təşəkkür ifadə olundu.