Seroloji test üçün hələki könüllü müraciətləri qəbul etmirik - TƏBİB

Tarix: 21 Avqust 2020 11:06

Bakı. Samir Əli - Trend:

Bir çox respirator viruslar orqanizmə daxil olduqdan sonra qanda onlara qarşı anticisimlər (immunitet) formalaşır.

Bunu Trend-ə açıqlamasında Tibbi Ərazi Bölmələrinin İdarəetmə Birliyinin (TƏBİB) infeksion xəstəliklər üzrə işçi qrupunun üzvü Nəzrin Mustafayeva deyib.

Onun sözlərinə görə, COVİD 19-a yoluxan şəxslərdə də bu immunitet seroloji testlərlə və qandan alınmış nümunələrlə aşkar edilir: "Bu testlər əhalinin müəyyən bir qismində aparılandan sonra artıq insanların neçə faizinin bu virusa yoluxub sağaldığı ilə bağlı statistika formalaşır. Son araşdırmalar onu göstərir ki, 81 faizə yaxın insan bu xəstəliyi yüngül simptomlu və ya simptomsuz keçirir. Həmin şəxslər hətta koronavirus xəstəliyini keçirdiklərinin fərqində olmurlar. Bir neçə gün onlarda kəskin respirator infeksiya müşahidə edilir və sonra sağalırlar. Həmin şəxsin koronavirusa yoluxuğunu seroloji testlər vasitəsilə qanda aşkar edə bilirik. Vətəndaşlar bununla bağlı müraciətlər edirlər və koronavirusa yoluxub-yoluxmadığını dəqiqləşdirmək istəyirlər. İndiyə qədər bu müayinələr özəl klinikalarda ödənişli həyata keçirilirdi. İndi isə biz bunu bir layihə kimi həyata keçiririk. Bu layihə Almaniya, Çin, Türkiyə, İspaniya kimi böyük ölkələrdə də həyata keçirilir. Azərbaycanda da bu layihəyə start verilib".

N.Mustafayeva bildirib ki, hazırda seroloji test əhali arasında təsadüfi seçmə yolu ilə aparılır: "Həmin şəxslərə bu müayinədən keçmək təklif olunur. Düzdür, bu prosesdə testdən könüllü keçmək istəyənlər də var və bununla bağlı müraciətlər edirlər. Amma bu proses layihənin təsadüfi seçmə prinsipini pozur. Ona görə də hələki könüllü müraciətləri qəbul etmirik. Seroloji testi venadan alınmış 3-5 milli qram qanın laborator müayinəsi zamanı müəyyən edilir. Bu testləri icra etmək üçün istifadə olunan reaktivlər Almaniyanın "Avroimmun" şirkətinin istehsalıdır. Bu reaktivlər qanda həmin anticisimləri təyin etməyə həssasdır. Bu müayinədən keçən şəxslərə həmçinin qanın ümumi analizi də ödənişsiz təyin edilir".

İşçi qrupunun üzvü bildirib ki, bu testlər vasitəsilə Azərbaycanda nə qədər insanın koronavirusa yoluxduğu müəyyən ediləcək: "Əgər test zamanı kimdəsə pozitiv nəticə aşkarlanarsa, həmin şəxs arxayın olacaq ki, o artıq COVİD-19-u keçirib və sağalıb. Bu, geniş miqyasda həyata keçirilsə, əhəmiyyətli nəticələr əldə edə bilərik".