Şəkidə xəsarət alan suriyalılar müalicələrini özəl klinikada davam etdirirlər

Tarix: 19 Iyul 2019 10:27

Bakı. İlhamə İsabalayeva - Trend:

Şəki Xan Sarayının qarşısındakı çinarın budaqlarının aşması nətiəsində xəsarət alan Suriya vətəndaşları müalicələrini özəl klinikada davam etdirirlər.

Trend-in məlumatına görə, həmin şəxslər bir ailənin üzvü olan Sara Hasan (sağ bud sümüyünün qapalı travması), Farik Hasan (sol incik sümüyünün sınığı), Al Hasan Samirədir (sağ baldır sümüyünün yerdəyişən sınığı).

Qeyd edək ki, onlar özəl klinikaya getməmişdən əvvəl Kliniki Tibbi Mərkəzə yerləşdirilmişdilər. Vəziyyətləri ağır stabil qiymətləndirilsə də, onlar üçün həyati təhlükənin olmadığı bildirilmişdi.

Səhiyyə Nazirliyinin mətbuat xidmətindən Trend-ə bildirilib ki, hadisə nəticəsində xəsarət alan Elxan Məmmədov Şəki Mərkəzi Rayon Xəstəxanasında müalicəsini davam etdirir. Onun vəziyyəti orta ağır stabil qiymətləndirilir.

Kliniki Tibbi Mərkəzdə müalicəsi davam edən İlkin Məmmədovun vəziyyəti isə orta ağırdır.

Xatırladaq ki, Şəki Xan Sarayının qarşısında çinar ağacının budaqlarının sınması nəticəsində 19 nəfər xəsarət alıb. Onlardan biri - 1987-ci il təvəllüdlü Xatirə Ağamalıyeva (sağ baldır sümüyünün çox qəlpəli sınığı, travmatik şok) dünyasını dəyişib.

Trend-in ən mühüm və maraqlı xəbərlərini "Telegram"da izləyin